CSU nagdala'g armas sa rally sikop

MALALAG, Davao del Sur -- Usa ka sakop sa Civil Security Unit (CSU) ang nasikop human naaktuhang nagdala og armas samtang mitambong sa political rally sa bise-mayor didto sa Purok 3, Barangay Mabini, alas 12:30 sa udto, Sabado, Abril 27.

Si Police Colonel Allan Manibog, provincial police director, nagbutyag nga si mayoralty candidate ug kasamtangang bise-mayor, abogado Roel Paras ang nagpahigayon og rally dihang ang campaigner niini nga si Emmanuel Loyloy Parba, 33-anyos, minyo, nakadiskubri nga adunay dalang armas si Edwin Preglo Monzolin, 56-anyos, minyo, usa ka CSU sa munisipyo.

Matod ni Manibog nga human masayod ang kampo ni Paras sa insidente dali nilang gi-aresto ang suspek hinungdan nga nahitabo ang komosyon niadtong higayona.

Narekober sa posisyon sa suspek ang usa ka kalibre .22 revolver nga dunay unom ka mga buhing bala ug ang kolor itom nga Samsung cellphone.

Atubangon sa suspek ang kasong pagsupak sa Republic Act 10591 kon Illegal Possession of Firearms and Ammunitions ug ang Omnibus Election Code.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph