DIGOS CITY -- Tingkagol sa selda sa Digos City Police Office (DCPO) ang usa ka ginang kinsa gikonsiderang usa ka big time pusher' sa Davao del Sur human masikop sa kapulisan atol sa anti-drug operation adlaw nga Sabado, Abril 27, sa Barangay San Miguel.
Ang Police Regional Office (PRO)-Davao Region nag-ila sa suspek nga si Cristina Durano-Bernat, 43-anyos, minyo, residente sa maong lugar.
Giingon sa report nga si Bernat maoy gikonsiderang top 2 provincial target drug personality sa Davao del Sur kinsa atol sa operayon nakuha gikan sa iyang posisyon ang duha ka pakete sa gituohang shabu ug mga drug paraphernalia.
Una niini ang kapulisan naglusad og search warrant batok sa suspetsado nga miresulta sa malampusong pagkasikop.
Ang operasyon usa ka hiniusang puwersa sa Davao del Sur Police Provincial Office, DCPO ug Philippine Drug Enforcement Agency (PDEA)-Davao Region.
Kasong pagsupak sa Republic Act 9165 kon Comprehensive Dangerous Drugs Act of 2002 ang ipasaka nga kaso sa suspek didto sa korte.