USA ka 20-anyos nga letsonero og manok sa Kilometro 5, Buhangin Davao City ang nagpakitabang sa kapulisan human nireklamo nga giti-unan siya og kutsilyo dungan sa pagsulti nga hold-up dayon gikuha ang iyang cellphone, Sabado sa kaadlawon, Abril 27.
Gilayon nga gisubay sa kapulisan ang maong insidente nga miresulta sa pagkasikop sa usa ka Adrian Banaag Arches, 22-anyos, residente sa Dumanlas, Buhangin.
Ang suspek maoy positibo nga gitudlo nga mikuha sa cellphone sa biktima.
Sa dihang girikisa sa kapulisan ang lawas sa suspek, nakuha pa gikan sa iyang posisyon ang duha ka pakete sa gituohang shabu.
Samtang ang duha ka kauban sa suspetsado ang wala na makita sa kapulisan sa lugar, human nakasibat sa pag-abot sa mga pulis.
Priso na ang suspek sa Buhangin Police Station diin duha ka mga kaso ang atubangon niini sa korte.