MIDANGOP sa Sta. Ana Police Station ang usa ka 22-anyos nga babaye human gireklamo ang iyang silingan nga miluwa kaniya ug giingnan pa gayud siya og baho'g kinatawo.
Sumala ni alyas Rochelle, 22-anyos, residente sa Barangay Wilfredo Aquino, Agdao District, Dakbayan sa Davao nga dili niya madawat ang gibuhat kaniya ni alyas Alberto, 25-anyos, ulitawo ug residente gihapon sa maong dapit.
Subay sa blotter sa Sta. Ana Police, alas 6 sa gabii, adlaw nga Sabado, Abril 27, naglakaw ang reklamante sa pathway sa Waling-Waling Street sa maong barangay, dihang kalit na lamang nangluwa si alyas Alberto ug naigo sa kamot ang babaye.
Gilayon nga gikumpronta sa mireklamo ang suspek apan kalit na lamang kini, misulti og “Baho-a og b**** oi”, hinungdan misamot ang kasuko ni alyas Rochelle ngadto sa lalaki.
Wala pa makontento ang lalaki sa dihang nagkalalis na sila, gisigundahan pa niya kini pagsulti og “Baho ka og b****, lata ka og b****”.
Sa kasuko sa babaye, nanawag kini og pulis ug gidala sa kapulisan ang lalaki ngadto sa istasyon diin pormal nga gipa-blotter.
Ang babaye nagpahayag nga andam siya nga mopasaka og reklamo batok kang alyas Alberto.
Depensa sa suspek, nga wala niya tuyoa ang pagpangluwa diin natimingan kini sa pag-agi sa reklamante.
Wala hinuon mapriso ang suspek apan mag-abot sila sa barangay aron didto sila maghusay.