NINGPATIGBABAW sila si Sam Betten sa Australia ug Amelia Watkinson sa New Zealand sa men’s ug women’s pro division kagahapon sa Sun Life 5150 Triathlon sa City of Naga, Cebu.
Ang 6’4’ nga si Betten mipakita kon nganong usa siya sa labing inilog sa kompetisyon pinaagi sa paghuman sa Olympic-distance race sulod sa usa ka oras, 59 ka mga minutos ug 32 ka mga segundos aron angkunon ang titulo sa men’s division.
“I pushed a little harder during the bike race to build a little gap because (Alexander) Polizzi was trailing close behind,” matod ni Betten sa interbyu sa Sun.Star Cebu.
“It was a great race, the swim was beautiful and also the bike course. On top of that is the great support from the crowd, that’s why I always keep coming back in the Philippines.”
Si Polizzi nahiluna sa ikaduhang dapit pinaagi sa oras nga 2:03:55 unya naa sa ikatulo ang laing Aussie nga si Mitch Robins, kinsa adunay oras nga 2:05:34.
Nadaog ni Watkinson ang women’s division pinaagi sa oras nga 2:06:44.
Nagsunod kaniya mao sila si Anna Eberhardt sa Hungary (2:14:51) ug Iijima Manami sa Guam (2:16:16).
“It was a nice experience. It was hotter than I expected and it was a good reminder of the extra humidity around here. I think I like (the heat), but it’s definitely tough,” matod ni Watkinson.
Sa Asian elite competition, si Jorry Econg sa Cebu City Rider Omega Triathlon Team maoy naghari pinaagi sa oras nga 2:12:15.
Sa Go For Gold Sprint race, ang mga ningkampiyon sa men’s age-group mao sila si Gian Taylor (1:11:36, 12-17), Denver Dayonot (1:14:37, 18- 24), Dandy Maturan (1:54:50, 25-29), Dennis Rey Rentillosa (1:41:45, 30-34), Jayran Manlangit (1:28:40, 35-39), Julius Hibrada (1:22:18, 40-44), Rosell Romulo (1:24:40, 45-49) ug Joselito Danao (1:50:17, 55-59).
Samtang ang mga mingkampiyon sa women’s category mao sila si Bianca Española (1:42:08, 18-24), Catherine Acuna (1:44:28, 30-34), Ma Cherryl Wuttke (1:45:44, 35-39), Merriam Calda (1:53:01, 40-44) ug Cheryl Mae Tagara (1:50:05, 45-49). (RSC, ESL)