Spurs gitagak sa Nuggets

2ND ROUND: Naggakos sila si Denver Nuggets guard Jamal Murray ug Monte Morris agi’g pagsaulog human nila nabuntog ang San Antonio Spurs, 90-86, sa deciding Game 7 sa ilang 1st round NBA Playoffs series kagahapon. (AP)
2ND ROUND: Naggakos sila si Denver Nuggets guard Jamal Murray ug Monte Morris agi’g pagsaulog human nila nabuntog ang San Antonio Spurs, 90-86, sa deciding Game 7 sa ilang 1st round NBA Playoffs series kagahapon. (AP)

HUMAN sa usa ka dekada, nakaabante og balik ang host Denver Nuggets sa 2nd round pinaagi sa pagbuntog sa San Antonio Spurs, 90-86, sa deciding Game 7 sa ilang Western Conference 1st round series kagahapon sa National Basketball Association (NBA) 2019 Playoffs.

Gipangulohan ni Jamal Murray ang kadaugan pinaagi sa iyang 23 puntos lakip na niini ang krusyal nga puntos sa nahabiling 36.8 puntos samtang nidugang og triple-double nga 21 puntos, 15 rebounds ug 10 assists ang All-Star center nga si Nikola Jokic.

“I love the grit, the resiliency, the toughness we played with tonight,” matod ni Nuggets coach Michael Malone.

“Even late when they made their run ... we never lost our composure.”

Ang batan-ong puwersa sa Nuggets nakamugna og 17 puntos nga labaw sa 3rd quarter apan hinayhinay nga ningbangon ang Spurs hangtod nga nakasikit sila pagbalik sa hinapos nga bahin.

Human nakasikit ang Spurs, 86-88, sa nahabiling 52 segundos, si Murray nakadawat og maanindot nga assist gikan kang Jokic aron ipasulod ang iyang floater nga naghatag sa Nuggets og 90-86 nga labaw sa nahabiling 36 segundos.

Sa return play, ang usa sa mga pambato sa Spurs nga si DeMar DeRozan misuway pag-agak sa iyang team pinaagi sa paglusot apan napalakan siya ni Torrey Craig sa nahabiling 28 segundos ug nakuha ni Jokic ang rebound.

Human niini, puwerteng singgit ni San Antonio coach Gregg Popovich ngadto sa iyang mga batos nga magmugna og foul aron mahunong ang dagan sa oras apan tungod sa kalangas sa abiba sa mga dumadapig sa Nuggets, wala na kini nadungog sa mga ginsakupan sa Spurs ug napupupos ang oras.

“After the game you’re thinking, ‘Why didn’t they foul?’” asoy ni Craig.

Ang Spurs gipangulohan ni Ruday Gay pinaagi sa iyang 21 puntos samtang nidugang og 19 puntos matag usa sila si DeRozan ug Bryn Forbes.

RAPTORS 108, 76ERS 95

Sa Toronto, nagpakatap og career playoff-high nga 45 puntos si Kawhi Leonard aron pangulohan ang kadaugan sa host Raptors batok sa Philadelphia 76ers sa Game 1 sa ilang 2nd round series sa Eastern Conference.

Kuyaw sab nga nakaduwa alang sa Raptors mao si Pascal Siakam, kinsa nidugang og 29 puntos alang sa kadaugan.

Unom ka mga magduduwa sa 76ers ang ningmugna og dobleng numero nga puntos nga gipangulohan ni JJ Reddick, kinsa nagpakatap og 17 puntos.

Ang 76ers maoy unang nakaratsada ug nakamugna dayon kini’g 7-2 nga labaw sa sayong bahin sa duwa.

Apan dihang nailog sa Raptors ang labaw, 9-7, wala na kini nila buhii hangtod na sa katapusang gutlo. (AP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph