‘Garma nanghulga’

GIPASANGINLAN si Cebu City Police Office (CCPO) Director P/Col. Royina Garma sa kapuyo ni Eddie Basillote nga nanghulga nga patyon ang iyang pamilya kon mopadayon sa pagpasaka og kaso batok sa mga pulis.

Mao kini ang alegasyon sa kapuyo sa dinakpan nga niatubang sa mga sakop sa media sa ilang balay sa Ponce 2, Compound, Barangay Carreta, dakbayan sa Sugbo kagahapon sa hapon, Abril 28.

Apan Garma hugot nga nihimakak sa maong pasangil ug nibahad kini nga mopasaka og kaso batok sa kapuyo ni Basillote.

Kahinumdoman, nag-viral sa social networking site ang kuha sa closed-circuit television (CCTV) nga unom ka mga lalaki nga nagdala og mga armas, aduna pay tag-as nga armas, ang nangulata sa giingong gidakop nga lalaki, diin giila kini nga si Eddie Basillote, 28, niadtong Huwebes Santo sa gabii, Abril 18.

Ang mga lalaki nga nakitang adunay mga armas ug nangulata, giingong mga pulis nga na-assign sa Talamban police station.

Una nga gitanggong ug na-blotter sa Talamban police station si Basillote sa buy-bust sa gidliling druga.

Matud sa babaye, kinsa nagdumili nga magpahingalan, nga niduaw siya ala una niadtong Sabado sa hapon, Abril 27, sa iyang bana sa CCPO detention cell, diin gialegar niini nga nakig-estorya kaniya ang iyang bana, kalabot sa giingon nga hulga sa director.

“Ang ako, nay giistorya ang akong bana sa ako (duhang) nihatud ko gahapon og kaon.Naa siyay giistorya nako nga si Garma, ni-psywar sa iya, pamatyon kuno mi, asta ang akong mga anak, mga ig-agaw sa akong bana kon dili i-delete ang mga video ug ipadayon kuno namo ang kaso,” alegasyon sa kapuyo.

Matud sa 24-anyos nga babaye nga nahadlok sila sa hulga, apan modayon ang ilang pagpasaka og kaso sa unom ka giila nilang mga pulis nga nikulata kang Basillote.

Hangyo niini kang Garma, “...dili sad mi niya ingon-anaon kay pobre mi. Wala mi ikasukol niya. Dili mi niya pamatyon kay pobre mi. Tan-awon sa niya ang video ba unsay sakto, ayaw lang intawon mi hilabti."

Giangkon sa babaye nga namaligya og ilegal nga drugas si Basillote, apan kaniadto ug giingong dugay na nga niundang.

GARMA MIHIMAKAK

Hugtanong gilimod ni Garma, kinsa nitug-an nga wala siyay oras nga mohimo niini.

“Sa tingin mo kailangan i-threat yan o gawin? Bahala sila kung ano ang sabihin nila, it’s a desperate move, kung may mangyari sa kanila, kasalanan ko pa? I will not waste my time,’ padayag sa direktor sa CCPO.

Bahad sa direktor nga kun padayunon sa kapuyo ang pagpamasangil nga giingong walay basehan, matud ni Garma nga tun-an nila ang posibilidad nga mopasaka og kaso.

“Bahala sila kung anong sabihin nila they just desperate, you know they are desperate, I don’t care..kung may mangyari sa kanila kasalanan ko pala, it’s up to them kung saan nila kinuha yung perception nila it’s up to them, I will not waste my time. Kung ite-threatened namin sasabin ko? It’s stupidity, ” matod ni Garma.

Gihimakak usab niya ang pasangil nga gi-post sa social media ni Mayor Tomas Osmeña nga usa sa walo ka mga pulis sa Talamban ang protektor sa usa ka drug personality sa Pulang Bato.

Dason niya nga naay politiko nga miangkon na nga midawat og P20 million gikan sa druglord nga si anhing Jaguar Diaz sa eleksiyon niadto.

“Ay lahat sinabe, eh yung iba dyan tumatanggap sa election, umamin pa nga na tumanggap ng 20 million kay jaguar, yun dapat tinitingnan ng mga tao..." tanghaga nga giluwatan ni Garma kon kinsa.

Lakip sa gikonsiderar ni Garma mao ang pagpasaka sa kasong libelo ni Osmeña tungod sa gi-post niini sa social media.

GANTI ASA NA?'

Ang Superbalita Cebu nisuway sa pagkontak ni Osmeña labot sa iyang saad kinsa iyang gihulagway nga dunay di momenos 15 ka text messages nga iyang nadawat nga adunay importanteng kasayuran pag-ila sa mga pulis.

“No comment,” bugtong tubag ni Osmeña kon iya na ba nga i-release ug kinsayhatagan sa reward nga hinayhinay na ang pag-ila ug pagkatangtang sa walo ka mga pulis sa Talamban. (Dugang ni AYB, PAC)