NINDOT nga medyo mitaas ang ang-ang sa kampanya sa nag-unang kandidato sa dakbayan sa Sugbo gikan sa paglinabay og lapok ug intriga ngadto sa pagtutok sa mga isyu ug ilang plata-porma nga dunay kalabotan ang publiko, sama sa pagtuki sa isyu sa edukasyon.
Si Mayor Tomas Osmeña sa Bando Osmeña Pundok Kauswagan (BOPK) nipaambit sa video post sa iyang Facebook account nga nagpakita sa kalambotan sa iyang programa sa college scholarship program ug nipadayag sa pagpadayon sa maong programa kon malugwayan ang iyang termino sa pagkamayor sa dakbayan.
Samtang, si Bise Mayor Edgardo Labella sa Barug PDP-Laban nipadayag sa iyang Fecebook account nga kon siya maoy palarang modaug sa pagkamayor sa dakbayan, usa sa iyang plano mao ang pagtukod sa Cebu City College aron motubag sa edukasyon sa mga kabus nga gustong mokita pinaagi sa pagtapos sa vocational, tehcnical, agricultural o ubang kurso sa kolehiyo.
Ang scholarship program komon nga programa sa edukasyon ubos sa pagpasiugda sa kagamhanan, institusyo, religous, civic o non-government organizations (NGOs). Kon pulitikanhong grupo o politiko ang nagpaluyo niini, klaro nga magamit kaayo kini sa pulitikanhong laraw. Subay sa kasinatian, ang scholars sama sa nahiktan sa utang kabubut-on sa politiko.
Ang pagtukod og public college nga libre o dili ba kaha ubos ang matrikula dalaygong lakang apan, risgo sa pamulitika. Panamini ang Mandaue City College (MCC) ug Talisay City College (TCC). Tungod sa pulitika, ang MCC hangtod karon dunay kasong nag-ung-ong sa korte nga wa pay pinal nga hukom. Ang TCC niagi usab og susamang kagubot. Hinuon, dunay ubang public colleges nga hapsay sukad sa sinugdanan sa pagkatukod.
Asa ka mouyon? Mao kini hatagan sa imong boto. Daghan pang isyu nga angay saw-an sa kampanya, ipadayon kini.