SUPERBALITA CAGAYAN DE ORO

Todino: Naniguro sa kaugalingon

Pro Bono

BASI sa ulahing resulta sa survey nga gipasiugdahan sa Kinaadman University Research Office, nagpakita nga ang isyu sa "environment" maoy iwit sa tanang concern karon sa mga botanti.

Ang isyu sa environment gilangkoban sa waste management, river condition ug disaster preparedness.

Ang nag-una mao kining isyu sa ekonomiya, labi na kining kakuwang og programa alang sa panginabuhian ug kakuwang sa trabaho sa dakbayan sa Cagayan de Oro.

Ang problema sa illegal nga drugas nabutang lang sa ika-duha.

Makapaalarma kining resulta kun nuntan nato nga mao kini ang kinatibuk-ang sentimento sa mga molupyo sa atong siyudad. Ngano man?

Kon timbangon nato, mas angay baya hatagan og gibug-aton kining problema sa kinaiyahan. Sa higayon nga mapasagdan na kini sa hingpit, molanat pa og pipila ka tuig una nato mapabalik sa iyang naandan nga kahimtang.

Diha man gud sa pag-atiman sa kinaiyahan, nadugtong diha ang disiplina, kamatinud-anon, pagkamaalagaron, pagkabinantayon ug uban pang mithi nga nagpalig-on sa kaayohan pag-protiher sa kalikupan.

Pananglit, kining pollution gikan sa dagkong mga kompaniya ug kining pagpamutol og kahoy ehemplo kana sa suliran sa environment.

Mag-unsa man ang usa local government unit kon makahatag kini sa mga molupyo og trabaho aron molambo ilang panginabuhi apan nakompromiso ang kinaiyahan ug kalikupan.

Kon pasagdan ang problema sa environment, segurado mosangpot kini sa isyu sa panglawas sa katawhan. Ug tungod unya sa nagkadaiyang balatian, makatigum ka man og nilibo ka pesos gikan sa panarbaho, kuwang na unya kana sa pagpatambal.

Ang ubang concern sa mga botanti mao kining paghatod og batakang serbisyo, kahuot sa trapiko, kakuwangon sa suplay sa tubig, problema sa drainage ug kining kauwang sa implementasyion sa mga ordinansa diha sa kabarangayan u gang pangukarot.

Subo lang palandungon nga anaa kanunay kining "pagtagbaw una sa kaugalingon" kay sa kinatibuk-ang kabalaka sa palibot.

Kining concern sa ekonomiya, labi na kining panarbaho, nagpakita lamang kon unsa ang matang sa mga tawo karon -- naniguro kanunay sa ilang kaugalingon.

Hinuon, dili ta matingala kay sa ulahing mga adlaw, matod sa Kasulatan: "Kay ang mga tawo mahimong mapalabilabihon, mahigugmaon sa kuwarta, hambogiro, mapahitas-on, magsulti ug daotan batok sa ilang isigka-tawo ug sa Dios, dili motuman sa ilang mga ginikanan, dili mapasalamaton, ug dili diosnon. Gawas pa niana wala silay kaluoy sa ilang isigka-tawo, dili sila makighusay sa ilang kaaway, daoton nila ang dungog sa uban; dili sila makapugong sa ilang kaugalingon, mabangis, ug supak sa bisan unsa nga maayo. Mabudhion sila, mapasagaron, ug mapasigarbohon. Palabihon pa nila ang mga kalibotanong kalipay kaysa Dios" 2 Timoteo 3:2-4


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph