SAMAD sa ulo ang naangkon sa usa ka sekyu nga napalgang nagkulob sulod sa Isuzu elf kagahapon mga alas 7:20 sa buntag sa National Highway sa Barangay Gusa, siyudad sa Cagayan de Oro.
Dako ang posibilidad nga nagpusil sa iyang kaugalingon si Danilo Llarenas, 42, minyo, temporaryong nagpuyo sa Barangay Gusa apan taga Wao, Lanao del Sur.
Sa pakighinabi sa SunStar Superbalita kang Romel Rallos, bayaw ni Llarenas, gibutyag niini nga niadto pa kini sa ilang dapit sa Barangay Cugman aron maligo og dagat ug nipauli aron mo-duty. Giingong taod-taod na kini nga bulag sa iyang asawa ug wala usab kini kontra.
Samtang mibutyag si Rodel Odarbe, ang relibo ni Llarenas, nga sa iyang pag-robing, nakita kini nga nagkulob sulod sa sakyanan ug nagkadugo.
Sumala usab sa mga residente sa dapit nga duna silay nadungog nga mga buto mga mga alas 2:20 sa kaadlawon.
Gibutyag ni PMaj Julius Clark Macariola, hepe sa Police Station 3 (PS3) sa Agora, nga dako ang posibilidad nga nagpusil sa kaugalingon sekyu gumikan kay walay nakitang laing samad gawas sa iyang ulo.
"Walay sign sa struggle, wala poy nangawala sa personal belongings niya and magconduct pa og paraffin test ang namatay aron makita kung siya ba ang nakapabuto ani," matud ni Macariola.
Nakuha gikan sa crime scene ang duha ka mga isyu sa armas nga shotgun ug 9mm ug 3 ka empty shell sa 9mm.
Gitutokan karon sa kapulisan ang pinakaduol nga anggulo sa pagpusil sa kaugalingon ilabi na nga layo ang posibilidad nga aksidente ng napusilan ang kaugalingon ug tulis gumikan kay walay nawala nga mga gamit.
Ang maong patay nga lawas ang kasamtangang dal-on sa punerarya.