GIILANG number 1 most wanted person sa probinsya sa Sugbo napatay sa engkwentro sa mga sakop sa Provincial Drug Enforcement Unit sa Cebu Provincial Police Office atol unta sa pagsilbe nilag warrant of arrest.
Lakip sa napatay ang iyang bata-bata. Alas 5:40 sa hapon sa Lunes, Abril 29, nakadawat ang kapulisan sa probinsya og impormasyon nga naa sa Friendship Village, Barangay Basak Nicolas, Siyudad sa Sugbo si Gerly Tabera Luwage.
Si Luwage, lumad nga taga sitio Crusher, Barangay Lawaan 3, Talisay apan giingong nag abang nag kwarto sa Basak San Nicolas sa siyudad sa Sugbo.
Tungod niini, dali sila nga niresponde dala ang warrant of arrest sa kasong illegal nga drugas nga giluwatan ni Judge Glenda Go sa Regional Trial Court (RTC), Siyudad sa Talisay.
Apan sa ilang pag abot sa giabangang balay, giingong giunhan ang mga pulis sa pagpusil hinungdan nga ilang gibawsan.
Lakip sa napatay ang iyang bata-bata nga si Junel Lasam, taga Barangay Lawaan, Siyudad sa Talisay. Matod ni Police Captain Alejandro Batobalonos, hepe sa Drug Enforcement Unit sa CPPO, nga dugay na nilang gi monitor si Luwage.
“Naay naka monitor niya gikan ni sa Talisay. Milayas ug diri na nagtago ug diri na nag-abang,” matod ni Batobalonos.
Nakuha sa crime scene ang armas nga gisusi pa sa mga sakop sa Scene of the Crime Operatives nga maoy gigamit sa pagpamusil sa mga police.