MILABNI og dobleng kampiyunato si BJ Pepito aron pangulohan ang mga ningdaog sa 2019 Mayor Joven Mondigo Invitational Motocross niadtong Dominggo sa lungsod sa Medellin, Cebu.
Ang lumad nga taga lungsod sa Daanbantayan ug sakop sa BP8 Racing miharos pagdaog sa pro open ug expert division titles ning maong makapaukyab nga kompetisyon nga gisalmutan og riders gikan sa nagkalainlaing suok sa Pilipinas.
Ang 17 anyos nga si Pepito nakasugakod sa hugot nga kompetisyon nga iyang naagian batok sa dekalidad sab nga rider nga si Denmark Supatan, kinsa maoy nahimong 2nd placer ning duha ka mga kategoriya.
Nagkanayon si Pepito nga taodtaod na sab siyang nangandoy nga mahimong double champion ug dako iyang kalipay nga natuman na kini ning higayuna.
Gawas kang Pepito, nakaangkon sab og duha ka mga titulo sa laing mga kategoriya sila si PJ Galia, Deolito Codiniera, Renren Hisoler ug Jeanette Olanda.
Si Galia milangkat sa mga titulo sa intermediate ug beginners open production.
Gipatigbabawan ni Codiniera ang elite category ug hasta ang executive C, ningdaog si Hisoler sa open enduro ug novice open production samtang milampos si Olanda sa ladies ug mini class 50cc.
Ang ubang mga ningdaog mao sila si John Hisoler sa local enduro, Britz Hisoler sa executive B, Seigfred Ornopia sa executive A, Terence Codiniera sa mini class 65cc followed, Carlo Comendador sa 80 mini class CC.
Kampiyon usab sila si Rey Tigue, Rex Pepito ug Joel Maquilan sa buggy samtang sila si Villaban, Junmar Agcoy ug Raymart Peligro sa underboze race. Ang nag-organisar nga si businessman-sportsman Lou Ornopia sa Ms Motosuit nakigitmbayong nila ni Jimboy Oro, Chito Poro, Randy Camus, Vilma Opone, Danny Albano, Butch Flores, Rey Quinal ug Gnald Panungaling sa pagpahigayon sa maong kompetisyon. (ESL)