NAPAKYAS si ALA fighter Jonas Sultan pinaagi sa unanimous decision batok kang Athi Dumezweni sa inilugay sa bakanteng World Boxing Council (WBC) Silver super flyweight title niadtong Dominggo sa gabii sa Orient Theatre sa Eastern Cape.
Si Sultan nalubong og maayo sa scorecards, gani wala siya’y nadag-an nga round sa usa sa mga judge nga mitali og 119-108. Ang laing duha ka judges mirehistro og 119-109 ug 117-109.
Ang trainer ni Sultan nga si Edmund Villamor miangkon nga lupig ang iyang batos apan nakugang siya sa scorecards sa judges.
Gipasabot ni Villamor nga sa sayong bahin pa lang sa away, nasayod na siyang lisod nga modaog si Sultan pinaagi sa puntos hinungdan nga iya kining gimanduan nga paninguhaong mapatumba si Dumezweni apan wala kini nahitabo.
Si Sultan nahagbong sa 15-5, 5KOs nga rekord samtang si Dumezweni misaka sa 12-2, 8KOs nga baraha.
Sa kapildihan, gilaumang modakin-as ang world ranking ni Sultan diin No.14 siya sa World Boxing Council (WBA) ug No.13 sa World Boxing Organization (WBO). (EKA, ESL)