NINGMUGNA og dobleng numero nga puntos ang tanang starters sa host Golden State Warriors pangulohan ni Kevin Durant aron patugpahon ang Houston Rockets, 104-100, kagahapon sa Game 1 sa ilang Western Conference semi-finals series sa National Basketball Association (NBA) Playoffs.
Si Durant nipakatap og 35 puntos, nidugang og 18 puntos si Stephen Curry, ningtampo og 14 puntos matag usa sila si Draymond Green ug Andre Iguodala samtang niamot og 12 puntos si Klay Thompson alang sa back-to-back defending champions.
“When he’s being as aggressive as he’s been, I don’t think there’s anyone in the NBA, maybe the world who can stop him,” paghulagway ni Green kabahin kang Durant.
Sama sa gilauman ning kombatiha, nga rematch sa Western Conference finals sa miaging tuig, grabe ka sikit ang panagsangka gikan sa sinugdanan hangtod sa katapusang gutlo.
Nakaginhawa og luagluag ang Warriors dihang nakapabuto og three-point bomb si Curry sa nahabiling 25 segundos nga naghatag kanila og 103-98 nga labaw.
Paglabay lang sa pipila ka mga segundos, gitubag kini ni Rockets guard James Harden og hansak gikan sa assist ni PJ Tucker aron pahakan ang labaw sa Warriors, 103-100.
Sa nahabiling 4.4 segundos, na-ejected ang pambatong pointguard sa Rockets nga si Chris Paul human siya natawagan sa iyang ikaduhang technical foul gumikan sa pagpakiglalis sa referee.
Apan alang kang Paul, wala siya’y gihimo nga angayang tawagan og technical foul sa referee.
“I don’t know yet. Nobody told me. He just called a tech,” matod ni Paul.
Ang laing pambato sa Rockets nga mao ang kasamtangang MVP nga si James Harden mireklamo nga dili makiangayon ang tawag sa mga referee nga maoy nakapasagmuyo kaniya.
“I just want a fair chance, man. Call the game how it’s supposed to be called and that’s it, and I’ll live with the results,” asoy ni Harden.
Ang Rockets gipangulohan ni Harden pinaagi sa iyang 35 puntos samtang nidugang og 27 puntos si Eric Gordon.
Celtics 112, Bucks 90
Sa Milwaukee, surpresang gipangmakmak sa Boston Celtics ang No.1 team ug host Bucks sa Game 1 sa Eastern Conference semi-finals.
Gipangulohan ni Kyrie Irving ang Celtics pinaagi sa iyang 26 puntos ug 11 ka assists, nihatag og 20 puntos si Al Horford samtang nitampo og 19 puntos si Jaylen Brown.
Kontrolado sa Celtics ang hapit kinatibuk-ang duwa.
Ang Bucks gipangulohan ni Giannis Antetokoumnpo pinaagi sa 22 puntos samtang miamot og 16 puntos si Khris Middleton. (AP, ESL)