KALMA ra ang editor ug kulomnista sa SunStar Cebu nga si Publio Briones III nga two-time nominee na diay sa Famas Awards. Laysho!
Una siyang na-nominate sa Famas sa “Confessional,” ang pelikulang nakapadaug usab niyang Best Supporting Actor sa 2007 Cinema One Originals Digital Film Festival.
Sa 2019 Famas Awards nominado sad siyang Best Supporting Actor sa pelikulang “A Short History of a Few Bad Things.”
Napildi siya sa Kapamilya actor Joem Bascon atol sa awards night sa Famas niadtong Dominggo apan, hellow!, Famas gud na! Joem Bascon pa jud!
Si Sir Pubs ubay-ubay nang nahimong pelikula lakip na ang 2016 Cebuano box office hit “Patay na si Hesus.”
Pahilom-hilom lang apan siguradong daghan pa ni siyang ma-achieve isip aktor. He’s definitely the guy to watch out for sa film industry. Congrats!
Avengers
Taasa gihapon sa linya sa “Avengers: Endgame” sa mga sinehan niadtong Dominggo.
Soldout ang 4 p.m. samtang sa 5 p.m. ug 6 p.m. sa atubangan na lang ang nahibiling mga bakanteng lingkuranan.
Kon sa 7 p.m. sad ka nga salida motan-aw gabii na kaayo mahuman kay tulo man ka oras ang running time.
Ang ending wa na lang gyud mi manan-aw. Dugay pa bitaw na mawa.
Puhon na lang, `Nak, kon di na ingon ana ka daghan.
Sentimento
Kon motan-aw mo og “Avengers: Endgame” pangutan-a sa ninyo kon wa ba’y Chinese subtitles.
Kay duna kunoy mga sinehan dinhi nga duna say Chinese subtitles pareho sa Manila. Oki ra ko sa English subtitles pero sa Chinese, di sad ko ganahan.
Una, di ko kasabot og ininsik. Ikaduha, samok tan-awon sa screen. Ikatulo, pareho mi og sentimento ni Regine Velasquez.
Unsa to? Di na lang ta mo-ek kay kon gubaton ta sa mga instik kadiyot ra tang mapapas! Kinsa man say nag-ingon nga makiggubat ta?! Haha! Pagka-brayt!
Unsay nahitabo?
Nakahinumdom ko sa indie movie nga “When Sadness Lingers” nga gi-shoot dinhi sa Cebu niadtong October 2018 nga gi-produced sa grupo sa mga Cebuano nga gitawag og SAVE (Society Awareness Voluntarism Empowerment).
Nagpa-presscon pa gani ang mga bida nga silang Sylvia Sanchez ug Noni Buencamino.
Target playdate nila niadtong December pero mag-Mayo na lang wa man gihapon silay kisaw. Bakit!?