NAKALITAN ang Sugbo dihang niguwa sa Facebook kining video footage nga mga armado nga nangulata og usa ka tawo nga wala gyud mosukol. Diha kini nahitabo sa Barangay Carreta. Nahibaw-an lang nga kining maong tawo gibalhog og bilanggoan diha sa Talamban police station.
Police ba ang nangulata? Moingon si Cebu City Police Chief Royina Garma nga tinuon pa niya. Bisag nanganlan na ni Mayor Tomas Osmeña ang pipila, igo lang kining girelibo nga tinuon pa lagi kon sila ba gyud ang nangulata.
Samtang giduphan sa ilang labaw ang mga nangulata, dunay moinsister sa pagpangutana ngano ang kapulisan ang pakasad-on ug dili ang gidakop kay nalambigit lagi sa gidiling drugas.
Ang ako lang ba. Walay ngil-ad nga mogukod ang kapulisan sa mga pusher ug drug lord. Apan, dapat mosubay sab ang mga law enforcer sa balaod.
Kining mga pulis nga di mosubay sa balaod, mao ni ang mga scalawag. Ug sama sa nahitabo karon diha sa Talamban ug ubang mga kaso nga naglambigit sa mga scalawag, nasurambaw na hinuon ang drug war.
Pamulitka
Dunay mga tigsuporta ni Presidente Rodrigo Duterte nga mobalewala na lang sa mga kalapasan sa balaod sa kapulisan basta makuha lang ang mga drug lord ug mga pusher.
Apan, sama sa gihisgutan ni Sen. JV Ejercito ug General Bato dela Rosa sa senatorial debate sa CNN, angayang silutan ang mga pulis nga abusado. Di man lagi abusado ang tanan. Alang kanako, mas epektibo man ang drug war nga gisubay sa balaod ang implementasyon.
Mahibulong lang ko dinhi sa Cebu City kay murag duphan man ang mga scalawag sa mga hepe. Manghinaot gyud ko nga nasayop ang akong obserbasyon.
Checkpoint
Ambot kon naesplikar ba ni Police Chief Royina Garma nganong naa sa duol sa kalihokan nilang Mayor Tomas Osmeña ug Konsehal May Ann delos Santos ang checkpoint sa kapulisan sa miaging gabii?
Gani, sunod-sunod ang mga checkpoint nga gipahigayon duol sa mga balay sa mga lider sa BOPK.
Moingon ang kaatbang nga normal lang kini aron masiguro ang peace and order. Unta, kon makasulbad dayon ang kapulisan sa mga krimen nga nanghitabo.
Gusto nako balikon ang coffee shop shooting pipila ka ka semana nga milabay diin duha ang namatay ug duha ang nangaangol.
Gihatag na sa mga tagtungod ngadto sa kapulisan ang mga ebidensya nga gikinahanglan apil na ang mga CCTV footage. Apan, daw gikalimtan na lang hinuon kay busy kaayo ang kapulisan sa pamulitika.
Isip pag-remind sa kapulisan, nagdala ang mga tagtungod og mga streamer nga nanawagan og hustisya. Apan nganong palpak man ang kapulisan? Kay namulitika?
Unta, unahon ni Police Chief Garma ang pagsulbad sa mga krimen sama niini. Di ba, chief? Kaya ba natin, chief? (@anol_cebu sa Twitter)