SO, NA-KONPIRMAR na nga ang mga armadong mga tawo nga naka-civilian ug nakita sa CCTV footage nga nangulata sa ilang mga dinakpan sulod sa usa ka bingo game shop o computeran mga pulis gyud diay. Nahitabo ni sa Ponce Dos Compound sa Barangay Carreta niadtong Abril 18, Huwebes Santo. Walo ka mga tawo ang nihilambigit sa pagpangulata sa tulo ka mga dinakpan atol sa drug buy bust operation.
Napagya ang maong insidente human mikatap ang CCTV footage sa social media. Nasuta nga mga sakop kini sa Talamban Police Station. Free for all na ang operasyon sa mga pulis karon sa dakbayan sa Sugbo kon illegal drugs ang operasyon. Buot ipasabot nga ang usa ka police station puwede na maka-operate bisan dili nila area of responsibility.
Ang “kanhi laos nga pulitiko” maoy miila sa maong mga pulis base usab sa mga impormasyon og text messages nga iyang nadawat gikan sa mga concerned citizens. Kini human siya mitanyag og P100, 000 isip reward sa makahatag og impormasyon sa maong mga tawo. Giila niya ang lider sa maong grupo nga si P/SSgt. Reoven Carmelo Rota uban nila ni P/Sgt. Brendo Tudtud ug laing upat nga na-ila lang sa mga angga nga Tagalog, Magdali, Lagunsad ug Adalim. Gi-relibuhan na ni sila sa ilang assignment.
Ang hepe sa Talamban Police station Police Captain Lisandro Quijano, una nang nanghimakak sa kalambigitan sa iyang mga tawo. Ang live-in partner ni Eddie Basiliote, usa sa mga dinakpan, mibutyag kon giunsa sila sa pagbun-og sa maong grupo. Gihulga pa silang patyon ni Col. Royina Garma, CCPO director, kon mopadayon sila sa pagreklamo sa maong hitabo. Apan gipanghimakak kini ni Garma. Para nako morag sobra na sab ni. Ingon ana lang kasayon nga mopatay og tawo si Garma aron lang depensahan ang binoang sa iyang mga tawo. Wala kahay pulitiko nga nagpaluyo ani? Mas maayo gyud nga mohimo og imbestigasyon ang kapulisan, unya tugutan sab ni Garma nga maka-imbestigar ang Commission on Human Rights aron mawala ang pagduda sa publiko nga mitabon siya sa mga abuso sa iyang nga tawo. (bobbygnalzaro@gmail.com)