MANDAUE City Police Office nihimo og imbentaryo sa mga business establishment nga huyang og seguridad kay way security guard ug closed-circuit television sa Siyudad sa Mandaue.
Kini human sa sunod-sunod nga mga tulis sa mga establisemento sa siyudad.
Niadtong Dominggo sa gabii, Abril 28, usa ka tindahan nga namaligya og petron products lakip na liquefied petroleum gas, sa Barangay Canduman.
Ang mga suspek, duha ka mga lalake nga naka-motorsiklo nga naka-helmet, nitulis sa tindera sa tindahan, diin nakuhaan kini og P6,000.
Ang pagtulis ang ika-11 na sukad sa Marso ning tuiga, diin ang description sa mga tulisan susama ra, lain-lain lang ang gigamit nga motorsiklo.
Matod ni MCPO director Police Col. Julian Entoma nga ilang nabantayan nga ang biktimahon mga establisemento nga huyang ang gipatuman nga seguridad o way gwardiya, sama sa usa ka spa o massage parlor, mga tindahan, ug uban pa.
Gipyansahan
Gitug-an ni Entoma nga ang mga tulisan, mao ang una na nila nga gi-report nga mga piniriso nga gipangpyansahan niadtong katapusan sa Pebrero.
Matud sa director nga nakakuha sila og intelligence report, nga pito sa mga gipangpyansahan, upat niini mga taga syudad sa Mandaue, ang gigamit karon sa pagpanulis.
Diin ang tuyo mao ang paglipat sa mga pulis nga focus diha sa anti-drug operation.
Duha sa mga tulisan ang nailhan na, usa niini mao ang ginganlan og Johnny Danuco, taga Barangay Jagobiao.,Siyudad sa Mandaue.
Si Danuco giingong sud gawas sa prisuhan ug niadto lang Enero ning tuiga andakpan ug napriso tungod sa di lisensyado nga armas.
Apan giingon nga gawasnon si Danuco niadtong katapusan sa Pebrero human gipyansahan.
Si Danuco ug kauban niini, kinsa gihulagway lang una ni Entoma nga kanhi masahista, gipasakaan na sa niaging semana og duha ka kaso nga robbery with intimidation, human gipang-ila sa mga biktima.
“Mao ni sila gipanggamit sa mga sindikato nga involved sa drugas, kay aron paglawgaw sa mga gihimo nga anti-drug operation nato. Grabe man ka-focus ang pulis batok sa drugas, mao ni manguha sila og mga patapon nga mga piniriso nga able modala ug mogamit og armas. Mga armed and dangerous ni sila. Mao ni ato karon gipa-monitor sa atong kapulisan. Ug giawhag ang mga business establishment nga sila mismo, negusyo gud na nila, dili sila magduha-duha pagsiguro nga naa sila CCTV ug mas maayo gwardiya, kay sila man punteryahon aning mga tawhana,” saysay ni Entoma.
Matod ni Entoma nga ang mga tulisan, dili mag-apas kon pila ang ilang matulis.
Sa mga niagi nga semana nga tulis, aduna lay nakuha nga P1,000 o gamay pa.
Si Danuco gihulagway nga daan na nalambigit sa notado nga tulisan niadto pang 2013.
Ang matag police station sa syudad ang nihimo og security survey inspection sa mga business establishment sa ilang area of jurisdiction.
Kon si kinsa kadtong makita nga huyang ang gipatuman nga seguridad, tambagan kini o i-rekomendar sa Mandaue City government nga ipa-suspenso o dili i-renew ang mga permit hangtod nga motuman.
Ang grupo giingong moigo usab sa dakbayan sa Sugbo, Lapu-lapu City, lungsod sa Consolacion ug Liloan.