GISUGDAN Lunes sa buntag, Abril 29, ang absentee voting, alang niadtong mga kawani sa gobyerno nga dili makahigayon sa pagduaw sa ilang mga polling precincts, aron makabotar sa pimiliay karong Mayo 13.

Sa dakbayan sa Mandaue, gihimo kini sa Mandaue City Police Office, alang sa mga pulis ang ni-avail.

Usa na niini si Police Chief Master Sergeant Froilan Gomez, kinsa lumad ug botante sa lungsod sa Carmen.

Galantaw siya sa kaugmaon sa iyang mga anak ug sa umaabot unya nga henerasyon sa ilang pamilya, maoy rason ni Gomez nga naninguha siya nga makabotar bisan man lang sa mga national nga mga kandidato.

“Ni-avail lang ko, tungod sa akong mga anak ba, para ugma, ilang mapupo ang akong gusto nga akong botaran, kinsa akong gituohan nga makatabang alang sa paglambo, makahatag og kaayo sa atong nasud,” saysay ni Gomez sa Superbalita Cebu.

Si Gomez usa sa 45 ka mga pulis nga na-assign sa MCPO, kinsa nahatagan og kahigayunan nga makasalmot isip absentee voter.

Gitug-an ni Jacqueline Reuyan, ang assistant election officer sa dakbayan sa Mandaue,kinsa usa sa nagbantay sa pagbotar, nga 56 ka mga pulis sa MCPO ang ni-apply apan 11 kanila ang wala ma-aprubahan tungod sa kakulang sa mga rekisitos.

Ang local absentee voting (LAV) ang tapuson ugma, Miyerkules, Mayo 1.

Sigon sa Commission on Elections (Comelec) nga ang mamahimong maka avail sa LAV mao ang mga kawani sa gobyerno, lakip na usab ang mga uniformed personnel sama sa kapulisan, kasundaluhan, kabomberuhan, Bureau of Jail Management and Penology, Coast Guard, Navy, ug uban pa.

Gibuhat kini gumikan sa ialng pagserbisyo atol sa adlaw sa piniliay.

Ang mga sakop sa mga tigbalita nga rehistradong botante ang gidawat usab.

Base sa Comelec Resolution no. 10443, mamahimong maka botar ang mga local absentee voters matag Abril 29 ngadto sa Mayo 1, gikan sa alas 8 sa buntag hangtod na sa alas 5 sa hapon sa mga designated o assigned voting areas nga gi identify sa mga pangulo niini.

Diin ang mga botante mamahimong makabotar sa mga position sa senador ingon man ang mga party-list groups.

Sa kinatibuk-an, adunay 35 mil ka applications ang nadawat sa Comelec alang sa local absentee voting nga nagpadayon karon.