HANGTOD sa Hunyo 30 na lang kutob ang kontrata sa 10 ka mga traffic enforcer sa Minglanilla Traffic Commission sa kagamhanan sa lungsod sa Minglanilla nga nagpositibo sa paggamit og gidili nga drugas sa gipahigayon nga random drug test sa Cebu Provincial Anti-Drug Abuse Office (Cpadao) niadtong Abril 15.
Si Israel Abalo, in-charge sa mga traffic enforcer sa Mitcom, nibutyag nga sa pagkakaron padayon nga nag-duty ang mga enforcer kay kon i-pullout tanan sa kadalanan, ma-paralyze ang kahimtang sa dagan sa trapiko sa ilang lungsod gumikan sa kadaghan niini.
“Automatic na sila after sa June dili na sila makabalik,” dason ni Abalo dihang nahinabi sa Superbalita Cebu niadtong Lunes, Abril 29.
Si Carmen Remedios “Ivy” Durano-Meca, pangu sa Cpadao, nibutyag nga sa 38 ka traffic enforcers sa Mitcom nga gi-drug test, 10 ang nagpositibo sa paggamit og shabu base sa resulta sa initial screening.
Naghuwat pa sila sa resulta sa confirmatory test.
Matod ni Abalo, nang-hire sila og mga job order nga maoy ipuli sa mga nagpositibo sa higayon nga di na makatrabaho human sa Hunyo.
Samtang, usa ka kawani sa kagamhanan sa siyudad sa Naga nagpositibo usab sa buwag nga drug test nga gihimo sa Cpadao niadtong Abril 22.
“In terms of sanction, that would really depend on the local chief executive,” dugang ni Meca.
Sumala niini, sila nakatutok karon sa ilang partnership sa Bureau of Jail Management and Penology (BJMP) sa Central Visayas sa pagpahigayon og random drug testing sa mga kawani sa maong ahensiya. Sigon ni Meca nga sukad niadtong Abril 1, pulos nagnegatibo ang 200 ka personnel sa BJMP nga gipaubos sa random drug test.
Sa maong ihap, 53 niini kay sa regional office samtang ang uban nakadestino sa lainlaing mga pasilidad sa lalawigan sa Sugbo nga ubos sa pagdumala sa BJMP.
Pulos usab negatibo ang resulta sa mga drug test nga gipahigayon sa Cpadao sa 42 ka mga kawani sa Barangay Binaliw, siyudad sa Danao niadtong Abril 5 ug sa 47 ka mga empleyado sa Barangay Quisol sa samang dakbayan niadtong Abril 8. (SCG)