PADAYONG gipanubayan sa kapulisan sa Davao City ang insidente nga pagkidnap sa tulo ka mga bata niadtong Dominggo didto sa San Antonio, Hilltop, Bacaca, Barangay 19-B, Poblacion, sa Siyudad sa Davao.
Subay sa sketchy report nga gipagawas Lunes sa udto, Abril 29, sa Davao City Police Office, nga usa ka Deborah Marie Guiterez, 33-anyos, ang mipatim-aw sa Women and Children Protection Desk (WCPD) aron i-report sa kapulisan nga gikidnap ang usa sa iyang kabanay.
Sa impormasyon nga gipadala ni DCPO spokesperson Senior Inspector Ma. Theresita Plaza-Gaspan nga nag-edad og otso anyos ang duha, samtang ang usa 10-anyos nga pulos nagpuyo sa Kilometro 4 sa nasampit nga dapit.
Sa pagpanubay nasuta nga usa ka binabaye nga taga Sto. Niño, Barangay 5-A, Bankerohan Davao City ang gituohang mikidnap sa tulo ka menor.
Sa labing ulahing impormasyon nga nakalap sa Superbalita Davao gikan sa kasaligan nga impormante, giingong nakit-an na ang tulo ka bata didto sa Bacaca Road, kagahapon sa buntag, apan wala pa kini gikomperma sa WCPD.
Nailhan na sab ang suspek nga usa ka 24-anyos, kinsa gituohang dunay deperensya sa pangisip nga giingong motukar-tukar lamang.
Nagtinabangay na ang kapulisan ug mga barangay official sa Barangay 19-B ug sa Barangay 5-A, ingon man ang mga kasikbit nga barangay nga mao ang Barangay 8-A ug Barangay 6-A gumikan kini nga mga barangay ang sagad adtoan sa suspek.
Nasuta sab nga duna na'y rekord ang suspek sa kapulisan sa sama niini nga insidente diin matagbaw nalang og pangita ang mga ginikanan sa ilang mga anak human gidala sa suspek.
Nasayran nga amigohon sa suspek ang mga gagmay nga bata ug iyang hanyagan nga moadto sa dapit nga malingaw sila sa mga talan-awon.
Ang kapulisan nagpahimangno sa mga ginikanan nga bantayan og maayo ang ilang mga menor nga anak ug di na pagawson sa dis-oras sa kagabhion.
Sukad sa pagsulat ning balita, ang kapulisan padayong naghimo og hot pursuit operation batok sa suspek.