USA ka minero ang gitabangan og patay sa upat ka mga magsuong lalaki didto sa Barangay Pamintaran, lungsod sa Maragusan, Comval Province.
Giila ang biktima nga mao si Rommel Suello, 35, lumad nga taga Cawayan, Tubigon, Bohol, ug temporaryong nagpuyo sa nahisgutang dapit.
Samtang ang mga suspek mao ang magsuong Teninges Patin, Bauso Patin, alyas Potot Patin, ug si Lito Patin, molupyo sa Barangay Masara, lungsod sa Maco.
Sa report gikan sa Comval Province Police Provincial Office nasayran nga alas 5:30 sa hapon niadtong Lunes nahitabo ang krimen.
Ang biktima nagbaktas padulong sa iyang panimalay gikan sa usa ka minahan apan pag-abot sa dapit, kalit lamang kining giatangan sa magsuong suspek.
Way daghang langas gipusil ang biktima gamit ang wa pa matinong kalibre sa armas.
Ang biktima nahiagum og mga samad pinusilan sa nagkadaiyang parte sa iyang lawas nga miresulta sa iyang kamatayon.
Mga suspek abtik sab nga misibat human sa hitabo.
Ang patay'ng lawas sa biktima gipahiluna na sa usa ka punerarya sa susamang lungsod.
Kapulisan sa lungsod sa Maragusan mihimo na og dugang imbestigasyon sa nahitabong pagpamusil. (Marvin Pineda)