SECTIONS
Sunday, September 15, 2019
SUPERBALITA CEBU

Pagpatay sa pulis bawos?

PANIMAWOS maoy nakitang motibo sa pagpatay sa usa ka sakop sa Provincial Drug Enforcement Unit sa Cebu Provincial Police Office.

Namatay diha-diha si P/MSgt. Junard Cinco human gipusil sa duha ka wa pa mailhing mga lalake nga nagmotorsiklo sa Barangay Media Onse, siyudad sa Toledo, alas 8:10 sa buntag sa Martes, Abril 30.

Ang pag-ambush nahitabo mga 14 oras human sila si Batobalonos ug iyang mga kauban ningronda ug ningpatay sa usa ka drug lord ug bata-bata sa engkwentro niadtong Lunes sa alas 5 pasado sa hapon sa Dakbayan sa Sugbo.

Sakay sa iyang motorsiklo si Cinco uban sa iyang asawa aron ihatod unta niya sa usa ka mall sa siyudad sa Toledo diin nagtrabaho ang iyang kapikas.

Pag-abot sa may national highway sa Barangay Media Onse, kalit silang gituparan sa riding in tandem ug gipusil makaupat ka mga higayon.

Si Cinco naigo sa liog ug ulo.

Ang asawa ni Cinco gikataho nga naangol sa pagkatumba ug daling gidala sa usa ka tambalanan sa Dakbayan sa Sugbo.

Human maigo si Cinco, nasarasay ang motorsiklo ngadto sa tuong bahin sa highway ug nangahulog sila sa kanal.

Nakuha sa close circuit television (CCTV) ang pag-agi nila ni Cinco, kinsa gisundan sa duha ka killers nga nagmotorsiklo.

Ang killers pulos naka full-face helmet.

Nakuha gikan sa crime scene ang upat ka mga kabhang sa bala sa .45 kalibre nga pistola.

Human sa pagpamusil, ang killers ningbalik sa agi paingon sa Siyudad sa Naga.

Gibaslan?

Si P/Capt. Alejandro Barobalonos, hepe sa PDEU sa CPPO, nasubo sa hitabo sa iyang sakop nga iyang gihulagway nga buotan.

Niadtong Lunes sa pag serve sa warrant of arrest ni Gerly Tabera Luwage, number 1 most wanted person sa probinsya sa Sugbo, wa makakuyog si Cinco kay dunay hearing sa kaso sa illegal drugs sa lain nilang dinakpan.

Bisan kon wa makakuyog si Cinco, dako siya og papel sa paglutos kang Luwage kay siya ang naghan-ay sa kaso, nagkanayon si Batobalonos.

Mao kini ang rason nganong nagtuo silang si Cinco ang gipiling baslan sa grupo ni Luwage.

Sila si Luwage ug iyang bata-bata nga si Junel Lasam napatay sa kapulisan sulod sa giabangang balay niini sa Friendship Village, Barangay Basak Nicolas, Siyudad sa Sugbo kay giingong nisukol nila ni Batobalonos.

“Buotan kaayo ning bataa. Hilumon ni kay kon naa mi lakaw, motrabaho ra gyud ning bataa nga walay langas ba,” matod ni Batobalonos.

Wa siyay kasayuran nga adunay gikakontra si Cinco, busa nagtuo si Batobalonos nga may kalabutan sa ilang trabaho ang hinungdan.

Nakadawat ila og intelligence report nga human mapatay si Luwage, ang grupo nibahad nga mobawos.

Matod ni Batobalonos, usa na ka drug lord si Luwage human mopuli kang Steve Go, kinsa namatay sud sa Mandaue City Jail niadtong Hunyo sa miaging tuig.

Kaubang binilanggo ra ang giingon nga nipatay kang Go atol sa usa pustahanay sulod sa bilanggoan.

Siya niingon nga ang tanang drug supplies ug mga armas ni Go naa na kang Luwage.

Gibutyag ni Batobalonos nga tuong kamot si Luwage ni Go samtang si Jerome Labitad ang walang kamot.

Killer

Gihulagway ni Batobalonos si Luwage nga killer sukad pa niadtong buhi pa si Go.

Siya ang gitumbok nga tigpatay sa mga asset sa kapulisan sa Dakbayan sa Talisay ubos sa sugo ni Go.

Ila kining gironda sa balay niini sa sityo Crasher, Lawaan 3, Dakbayan sa Talisay tungod sa pagpamaligya og illegal drugs.

Nakaeskapo si Luwage ug nagtago-tago sukad niadto, apan ilang napasakaan og kaso sa pagpamaligya og illegal drugs.

Mao unta kini ang warrant nga ilang i-serve niadtong Lunes, matod ni Batobalonos.

Wa na siya makahatag og mga detalye sa mga pagpamatay ni Luage kay matod niya, didto pa siya sa Dakbayan sa Danao nadestino niadtong higayuna.

Si Batobalonos niingon nga ang iyang nahuna-hunaan nga grupo nga nanimawos kang Cinco, kang Luwage ra.

Bisan si Police Brigadier General Debold Sinas nagtuo nga grupo ni Go ang nipatay kang Cinco aron manimawos sa nahitabo kang Luage.

Giingong nibahad ang grupo nga mobawos sa mga pulis.

“This is one of the retaliation of the group of Steve Go because we just recently neutralized si Gerly Luwage nga mobalos sila,” dugang ni Sinas.

Siya nipadala na dayon og tracker team sa Siyudad sa Toledo aron moabag sa manhunt operation sa mga killer.

Iyang gimandoan ang mga pulis sa pagdakop sa labing dali nga panahon sa killers buhi man o patay.

“Two tracker teams are ongoing didto and I told them to get that person dead or alive. This is armed and dangerous,” matod ni Sinas.

Tungod sa hitabo, nipagawas nag kamandoan si Sinas sa iyang mga sakop nga magbantay tungod sa bahad nga manimalos na ang mga durugista sa kapulisan.

Si CPPO Director Police Colonel Manuel Abrugena dali nga nibisita sa Toledo City police station aron mangayog impormasyon sa dagan sa manhunt operation. (dugang taho ni GPL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph