CALBAYOG City- Prinsipal sa usa ka pampublikong tunghaan nasikop sa anti-illegal drugs operation sa kapulisan ug Philippine Drug Enforcement Agency (PDEA) 8.
Giila ang suspek nga si Arnulfo Abellar, alyas Arnold, 47, prinsipal sa Danao 1 Tinambacan District, Calbayog City, taga Barangay Obrero ning dakbayan.
Ang kapulisan sa Calbayog pinangulohan ni Police Lieutenant Colonel Joie Pacito Yape nilusad sa maong operasyon.
Kini human nakadawat og daghang report ang kapulisan sa ilegal nga kalihukan ni Abellar.
Matod sa kapulisan, gipaubos nila sa makuti nga pagpaniid ang suspek gumikan kay di sila katuo nga bisan prinsipal, nag-sideline kini sa ilegal nga drugas.
Sa pagpaniid sa kapulisan, ilang nasuta nga tinuod ang mga report.
Alas 8 sa gabii sa Lunes, Abril 29, pinaagi sa usa ka poseur buyer, gipalitan ang subject ug nagpositibo.
Daling gipalibutan sa kapulisan ug PDEA ang dapit aron di makaikyas ang suspek.
Nilampos ang mga operatiba sa pagsikop kang Abellar, kinsa nakuhaan kini og tulo ka pakete sa gituhoang shabu ug kalibre .357 nga revolver nga dunay lima ka mga bala.
Ang shabu nitimbang og 10 gramos ug gibana-bana nga mokantidad og P68,000.
Naa ka karon sa kustodiya sa kapulisan si Abellar.
Pasakaan siya og kasong kalapasan sa Republic Act 9165 kun Comprehensive Dangerous Drugs Act of ug ilegal nga paghupot og armas ug mga bala nga kalapasan sa Republic Act 10591.