MIDAHUNOG karon ang huhungihong nga dili lang diay si Anthony Davis ang target sa Los Angeles Lakers ug ni LeBron James kon dili nalakip usab sa ilang radar si Kevin Durant kinsa posibling mamahimong free agent karong tuiga - kana kon dili niya pirmahan ang iyang option sa defending champion Golden State Warriors.
Matod pa sa tinubdan nga sa iyang instagram, si James nagparamdam ug nangitag paagi nga motapon si KD sa Lakers kinsa andam ug aduna pay igong pundo nga makaabot sa iyang presyo.
Giingon nga ang Lakers aduna pay $38 million nga gahin sa umaabot nga summer. Gituohan na usab sa kadaghanan nga dili na mopirma pa og balik sa Warriors si Durant bisan og unsa pay mahitabo sa ilang kampanya nga sa ikatulong sunodsunod nga higayon madepensaan ang ilang titulo.
Sa kasamtangan, ang Golden State Warriors hugot nga nakigkombati sa Houston Rockets sa playoffs semis sa Western Conference. Midaog sila sa Game One ubos sa pagpangulo ni Durant kinsa mipaulbo og 38 puntos.
Pero dili lang kay ang Lakers maoy nagtinguha ni KD ug ni Davis. Ang lig-on nilang ikakompetensiya mao ang New York Knicks. Gani ang Knicks, kon mo no. 1 sila sa draft pick, andam mobaylo niini ngadto ni Davis, ug sa samang higayon, makatanyag usab og maximum contract ni Durant.
Sa pagkakaron, wa pay klaro ug morag baruto nga nagtukwangtukwang nga naglawig sa kadagatan ang sitwasyon sa Lakers tungod sa daghang mga rason. Dili maayo ang ilang dagan sa karon nga season nga dakong sukwahi sa una nang gituohan.
Wala pa silay headcoach hangtod karon human nila taktaka si Luke Walton kinsa sulod sa tulo ka tuig wala gyud makapasulod sa Lakers sa playoffs, bisan pa man sa paghiabot ni James.
Gibiyaan usab sila sa ilang presidente sa Basketball Operations nga si Magic Johnson. Bisan unsaon nila og tabon, di gyud matago nga dako pa kaayo sila og trabahuon aron mahitsas ang mga position sa team.
Laing mga star players ang giatngan nga mamahimong free agent sa summer. Kini naglakip nila ni Klay Thompson ug Kawhi Leonard. Bisan og usa lang ang ilang makuha niini, posibling makaayo na sa team.
Pero sa sitwasyon sa pagkakaron, morag dili pa gyud sila ang prayoridad nga malandigan sa mga nanag-unang free agent sa umaabot summer kay lagi sa gikaingon ko na, medyo gubot pa ang ilang organisasyon, ug dili kini makapakombinse sa ubang mga players.
Bugtong si James lang ang makapa-attract. (junmigs0622@yahoo.com)