ANG Davao City Police Office (DCPO) nanawagan sa katawhan nga motabang sa kapulisan sa pagpaniid sa mga tawo nga nagdala og armas luyo sa hugot nga pagpatuman sa Comelec gun ban.

Ang panawagan gikan kang DCPO director Police Senior Superintendent Rene Aspera human dunay gipatay nga habal-habal drayber mga 300 metros ang gilay-on gikan sa Tugbok Police Station sa alas 8:30 sa buntag niadtong Martes.

Ang biktima giila sa kapulisan nga mao si Randy Vosotros, 41, dunay live-in partner, habal-habal drayber ug nagpuyo Barangay Tugbok Proper.

Si Vosotros nagpaabot lang og pasahero sa maong lugar apan kalit siyang giduol sa wala mailhing mamumuno ug didto gipusil sa lima ka higayon hangtud namatay atubangan sa Mintal Public Market.

Ang mamumuno human sa pagpamusil yanong nagbitbit sa iyang .45 kalibre nga pistola dayon misakay sa iyang motorsiklo paingon nga Tugbok Proper.

Hangtud sa pagsulat ning balita, wala pa masayud ang kapulisan kung uns ang motibo sa mamumuno nganong gipatay ang biktima.

Si Aspera nagbutyag sa mga tigbalita nga nakalusot ang mamumuno gumikan kay dili tanang higayon mabantayan sa kapulisan ang mga dapit diin sila mohimo og krimen.

"The proliferation of illegal firearms is still happening in some areas in the city. Karamihan sa kanila ay nakakalusot dahil binabantayan din nila ang mga pulis natin," ni Aspera.

Giangkon sa maong opisyal nga hilabihan kadako ang siyudad sa Davao mao nga dili malikayan nga dunay mga krimen nga mahitabo sulod sa iyang area of responsibility.

"Davao City is too big for us. For the information of everybody, we have only 1,200 policemen so we need the help of the citizens," suma ni Aspera kinsa midugang nga ilang gipangandaman karon ang pagbantay sa seguridad sa mga tawo nga moanhi sa siyudad karong Araw ng Dabaw. (AD)