WAY nakitang basehanan ang hepe sa Lapu-Lapu City Police Office nga nagkinahanglan nga iisa ngadto sa orange gikan sa yellow category ang status sa Lapu-Lapu sa Election Watchlist Areas (EWAS).
Kini may kalabutan sa na-unang panawagan sa kampo ni mayoralty candidate Junard Chan, Team Libre/PDP-Laban human nga duha sa iyang lider/supporter ang gipusil ug pulos nangamatay nagkinahanglan og dugang pwersa sa kapulisan aron masiguro ang kaluwasan sa mga kandidato.
Labing uwahi insidenteng pagpamusil ngadto ni Cesar Siaton suporter sa Team Libre nga gipusil sa Barangay Babag niadtong Abril 27.
Gipahibawo ni Obon nga gikinahanglan iya usab nga paminawon ang tanang naglangkob sa Joint Security Coordinating Council meeting nga gikatakda karong Mayo 2 diin lakip nga motambang ang election officer sa Lapu-Lapu, Atty. Rainer Layson.
“Dili ta basta-basta maglink nga election related. There are parameters we need to follow,” pasabot ang opisyal.
Gihulagway ni Obon nga isolated case ang nahitabong pagpamusil sa Babag diin adunay gikatakdang pulong-pulong nga ipahigayon apan nagpadayon pa ang imbestigasyon ingon man ang pag-ila sa mamumuno sa dihang way saksi, taliwala sa presensiya sa kaubanan sa biktima atol sa nahitabo.
Nagkanayon si Obon nga pabilin nga hapsay ug malinawon ang dakbayan gawas sa mga isolated case nga panghitabo, gani base sa peace and order situation makita sa chart nga gipresentar sa Regional Investigation Division sa Police Regional Office 7 nga sobra sa katunga ang pagkunhod sa index crime sa Lapu-Lapu itandi sa miaging tuig.
Sa unang quarter sa 2018 adunay natala nga 337 index crime ug mikunhod ang gidaghanon og 64.1 percent sa dihang mitala og 121 index crime sa 2019 sa susamang quarter.
“So kon orange (category) ta sa EWAS medyo dili mag coincide sa atong statistic on what is the prevailing situation of our city,” dason ni Obon.
Samtang si Lapu-Lapu City Mayor Paz Radaza nagkanayon nga bisan nga suporter sa Team Libre si Siaton ang siyudad wa magkuwang sa paghatag og ayuda sa biktima kinsa gidala sa Vicente Sotto Memorial Medical Center ilabi na sa iyang medical needs.
Apan gikuwestiyon ni Radaza sa dihang dili tataw kon unsay actual nga nahitabo atol sa pagpamusil ilabi na nga sa imbestigasyon sa kapulisan ang mga tawo sa area wa makakita sa giingong gunman nga nagmotorsiklo aron sa pagsuporta sa ilang claim.
“Are we creating an incident to make it or aron maingon ana?.” kuwestiyon sa mayor sa pasangil nga ilado si Chan nga momugna og scenario nga makapa-ukay sa publiko.
Sa sayo pa, nasayran nga si Siaton mi-assist niadtong mga nangabot nga kandidato nga mo-park sa ilang mga sakyanan aron nga motambong sa gikatakdang pulong-pulong sa Babag, kalit lang milanog ang usa ka buto sa armas.
Gidali og dala sa city hospital ang biktima nga naka-angkon og samad pinusilan sa iyang tiyan ug laing samad diha sa luyong bahin sa iyang lawas nga gituohang milapos ang bala. (FVQ)