GITUOHANG gi-urom ang usa ka lalaki human nga kalit nga nigahi ug nakabsan sa kinabuhi kagahapon mga alas 2:15 sa kaadlawon diha sa Northern Mindanao Medical Center (NMMC) sa siyudad sa Cagayan de Oro.
Patay ang biktima nga si Reny Esquerra, 37, nga taga San Lazaro, Agora, Lapasan, ug usa ka assistant pastor.
Sa nahipos nga impormasiyon, giingong posibleng gi-urom si Esquerra human nga napalgan kining ninggahi na ang lawas. Giingong gisulayan pa kini sa mga doktor sa pagluwas apan wala na kini natabang ug nakabsan sa hinulamang kinabuhi.
Subay usab sa igsoon nga niadtong gabhiona sa wala pa kini natulog nibutyag pa kini nga kuhaon ang iyang anak nga anaa sa Molave ug gani nag bible study pa kini sa wala pa natulog.
Gidugang pa nga lami kaayo ang kaon niini og panihapon gumikan sa sud-an nga inun-onan nianang gabii.
Nakurat na lang ang asawa sa dihang nakitang nanggahi na ang bana ug dali pa nga gidala sa NMMC ug gitabang apan walay swerteng nakabsan sa kinabuhi.
Samtang laing lalaki usab ang gitoohang gi-urom, kinsa nailang si Cerilo Caballero ug giingong barbero nga residente sa Zone-9, Barangay Bulua ning siyudad human napalgang wala nay kinabuhi.