WALAY bili alang sa kampo ni Jose Gabriel La Viña ang resulta sa Xavier University Kinaadman: University Research Office (Kuro) ilabi na nga nagtuo nga dunay nagpaluyo niini nga kaatbang sa politika.
Gidugang pa niini nga mas gituohan ang nigawas nga resulta sa survey nga gipahigayon sa SMSU Team diin miabot sa 60.4 percent ang rate nga iyang nakuha kumpara sa nakuha ni Mayor Oscar Moreno nga anaa lamang sa 34.8.
Samtang una na nga nibutyag ang kampo ni Moreno nga mas nadasig pa ang grupo tungod sa resulta ug malaumon sa ilang tumong nga 11-0 sa matag distrito.
Mapasalamaton usab si Vice Mayor Rainier Joaquin Uy sa maong resulta bisan ugaling survey lamang kini apan kini pagmatuod lamang nga dunay nakita ug nabati nga programa ang katawhan gikan sa lokal nga kagamhanan diha sa ilang pagdumala sa siyudad.
“It's just a survey pero at least sa duration of period of time sa start of the campaign, nakita nato nga tingali mas daghang nalipay o daghan naka benipisyo sa batakang serbisyo, programa sa gobyerno tingali mao siguro na ang outcome,” matud ni Uy.
Dako usab ang pagsalig niini sa maong institusyon ilabi na nga taod-taod na kini ug nagtoo nga dili kini maghimo nga makadaot sa ilang ngalan sa maong tunghaan nga dugay na nga gi-ampingan.
"When it comes to legitimacy ang Xavier University itself nga ang Xavier pila na ka tuig, dekada nag-exist sa usa ka panahon ila lang dauton ilang ngalan tungod sa politika. I think dili tingali, mismo ang institution itself unya ingon anaon lang pagdaot ug kana ila gyud na gi-atiman ilang ngalan as independent, fair and honest institution,” dugang ni Uy.
Nasayran nga susama nga dunay pagduda sa nigawas nga resulta sa maong tunghaan ang kampo ni La Viña ug giingong dunay nagpaluyo niini.
Nasayran nga nakakuha si Moreno og 61.5 porsyento ug gisundan ni La Viña sa 16 porysento samtang si Uy, kinsa running mate ni Moreno, nakakuha og 55 porsyento samtang ang kaatbang nga si kanhi mayor Vicente Emano nakakuha og 23.6 porsyento.
Sa distrito uno usab sa pagka-kongresista nag-una ang kasamtangang kongresista nga si Rolando Uy sa (PDP-Laban) nga dunay 66.1 porsyento, gisundan ni Caesar Ian Acenas (PDP) sa 16.4 porsyento ug mas nakakuha usab og suporta sa katawhan sa distrito dos mao si Rufus Rodriguez nga dunay 59.2 porsyento nga gisundan ni Yan Lam “Alam” Lim sa 19.4 porsyento.
Una na usab nga gipasalig ni Dr. Astrid Sinco, deputy director sa Kuro ug project leader sa poll survey, nga independente ang gihimong poll survey ug giingong kini nga kalihukan isip pagtamod sa adbokasiya alang sa clean, honest, accurate, meaningful, ug peaceful nga eleksiyon.