GIPASIDUNGGAN si Vice Mayor Joaquin Rainier Uy sa Cagayan de Oro City sa Superbrands Marketing International Inc. (SMI) diin usa sa mga outstanding local legislator niadtong Huwebes, Abril 25, didto sa kaulohan.
Duha lamang ka magbabalaod sa tibuok nasud ning tuig 2019 ang nakadawat sa pasidungog diin usa si Uy ug ang ikaduha mao si Vice Mayor Roseller Rizal sa Calamba City, Laguna pinaagi na usab sa presidente ug CEO sa SMI nga si Harry Tambuatco.
Sa pakighinabi kang Uy, gibutyag niini nga mapasalamaton kini sa SMI ug ilabi na sa kaubanan niini sa 18th council nga usa sa mga rason sa mga nakab-ot nga mga pasidungog sukad nga naglingkod diha sa pangatungdanan.
“Sa akong nakuha nga pasidungog, tungod pud kana sa akong mga kauban sa City Council, tungod sa harmony and unity sa atoang panag-uban sa atong mga kauban, pagsinabtanay nga anaa kanunay ilabi na sa executive branch atong mayor uban sa mga kauban, different committee chairman nga nagpanday og ordinansa,” matud ni Uy.
Gidugang pa usab niini nga usa sa mga nakita nga kaayohan ug dakong tabang alang sa katawhan mao ang paghimo og departamento sa City Risk Reduction and Management Department (CDRRMD) ug City Housing Urban Development (Chud).
Giingong dako kini nga gibasehan tungod kay pinaagi sa paghimo og departamento sa CDRRMD, andam ang lokal nga kagamhanan sa paghatag og serbisyo ngadto sa katawhan nga sa tanang panahon kung dunay mga kalamidad kini aron malikayan ang susamang nahitabo kaniadto sa Sendong nga wala nasayod ang katawhan kung asa modangop.
Lakip na usab ang paghimo usab og departamento sa Chud o diha sa programa sa lokal nga kagamahan sa mga panimalay.
“Ang basis is the ordinance. Naka-affect siya as a whole una sa tanan ang ilang gikuhaan og base is ang pag-institutionalized sa CDRRMD, ikaduha ang City Housing Urban Development department nga nabuhat, dakog epekto ilang basis is ang ordinance nga na-implementar nga nakaapekto sa kinabag-an nga katawhan nganong kita isa pud napili kay dili tanan nga siyudad nga nakahimo og susama niana,” dugang ni Uy.
Ang SMI nga nalambigit sa consumer ug service products usa ka award giving body nga maoy mo-rekognisar o mo-ila sa mga talagsaon ug dunay maligdong nga mga binuhatan nga opisyal diha sa pagpanerbisyo sa lokal nga kagamhanan.
Kahinumdoman nga nakadawat usab og pasidungog ang 18th council nga mao ang outstanding Sanggunian gikan sa Department of the Interior and Local Government-Northern Mindanao.