SAMTANG nagkaduol ang eleksyon, nakabantay ko nga dunay mga barangay ug Sangguniang Kabataan (SK) officials nga dayag kaayong nangampanya sa ilang gidapigan nga politiko.
Kini nahitabo bisan pa man nga nagpahimangno ang Department of the Interior and Local Government (DILG) ngadto sa mga opisyales sa barangay nga di moapil sa partisan nga politikal nga aktibidad.
Nakasulti ako niini tungod kay nakabantay ako nga dunay mga opisyales sa barangay nga dayag kaayo nga nisuporta sa kandidato pinaagi sa pagsalmot sa mga campaign activities ug nahimong tigdepensa sa social media site nga Facebook.
Kini nahitabo dinhi sa atong rehiyon diin matag-karon-ug-unya akong makita ang ilang mga aktibidad.
Niadtong Abril 12 ning tuiga nabalita nga si DILG Undersecretary Epimaco Densing III nag-endorsar sa reklamo sa mga katawhan batok sa 52 ka mga barangay ug SK officials nga nalambigit sa electioneering.
Ang DILG naghangyo sa Comelec nga lantawon kini nga butang ug mopasaka og kaso batok sa mga hintungdan tungod kay nakalapas sa balaod ug sa mga lagda sa Civil Service Commission (CSC).
Dunay nagsulti nga mamahimo nga makakampanya ang barangay opisyales tungod kay gipili sila sa tawo ug makonsidera nga political office ang ilang gialagaran.
Apan, ang Joint Resolution No. 1600298 sa CSC ug Comelec naglatid unsa ang political offices nga apil sa exemption sa pagdili sa pagkampanya atol sa eleksyon.
Kini mao ang Presidente ug Bise Presidente, mibyemro sa Gabinete, uban nga elective public officials, (gawas lamang sa barangay officials), ug personal ug confidential staff sa nahisgutan nga mga opisyal base sa Section 261 sa Omnibus Election Code.
Dayag nga ang opisyales sa barangay, isip non-partisan, di gayud exempted sa pagpangampanya sa pagsugod sa campaign period.
Ang ubang mga kawani sa gobyerno, gawas sa mga nahisgutan sa unahan, di mahimong mangampanya sa usa ka kandidato.
Apan, subo nga palandungon tungod kay dunay akong mga kaila nga barangay officials ug plantilla employees sa gobyerno nga dayag nga misupak sa balaod.
Ingon niini na ba gayud ka dunot ang sistema? Nasayud kaha sila sa balaod o nahaylo lang gyud sa salapi?
Hinaut nga walay pabor-pabor ang DILG ug Comelec sa pagsilot sa mga tawo nga nisupak sa balaod, silotan bisan dumadapig pa sa administrayon.