DIGOS CITY -- Sanglit way klarong panginabuhian ang probinsiya sa Davao del Sur, daghan ang nanimpad nga makagawas sa laing nasud o madawat na lang sa mga lokal nga employer.
Pipila ka mga taga probinsiya ang manimpad sa gitanyag sa Department of Labor and Employment (Dole)-Davao nga lima ka adlaw nga pre-registration job fair sa usa ka dakong mall sa Bajada, Davao City.
Gibutyag sa Dole nga daghan ang naninguha nga madawat sa duha ka adlaw nga “Trabaho, Negosyo at Kabuhayan (TNK) Job and Business Fair” sugod adlaw’ng Miyerkules Mayo 1, hangtud Mayo 2.
Sama kang John Rey Vibas nga taga Sta. Cruz, Davao del Sur midayo sa Davao aron nga mo-aplay og sales associate sa usa ka mall.
Gitataw sa Dole nga gawas sa mga local employers, daghan sab ang naningkamot makagawas sa laing nasud human anaa ang presensiya sa mga overseas employers.
Nasayran nga sagad sa mga kompaniya, nangita og trabahante nga adunay kaagi sa field work.
Si Adelyn Arat, representative sa BMI Finance Corporation, nitataw nga sagad sa mga daling dawaton kadtong mga aplikante nga makamaong momaneho og motorsiklo, mohimo og trabahuon sa gawas ug mahinungdanon nga adunay lisensiya.
Gihimo sa Dole ang pre-registration aron nga modiretso na ang mga aplikante sa interview karon ug ugmang adlawa.
Mitak-op sab ang pre-registration banda alas 6:00 sa gabii, Martes, Abril 30.
Apil giimbitahan sa DOLE ang Department of Trade and Industry aron mahimong kabahin sa aktibidad aron nga kadtong di na modayon sa trabaho moadto na lang sa negusyo. (Orlando B. Dinoy)