GIPOSASAN sa Tugbok Police Station ang ilang kabaro nga pulis human kini napamatud-an nga nangawat sa usa ka police recruit trainee nga si patrolwoman Rhealen Aure sa Public Safety Basic Recruit Course.
Kasong theft ug Commission on Elections gun ban ang gikaso kang Police Corporal John Francis Casicnan nga nakadestino sa Mati City Police Station sa Davao Oriental.
Sa report, nasayran nga alas 8:30 sa buntag Martes, Abril 30, giingong gisulod sa suspek ang female Ron-Ron Barracks sa Regional Training Center 11 ug naaktuhan kini nga gikuha ang P5,000 nga cash sa biktima nga nakita pa sa mga kaubanan ang panghitabo.
“Sinamantala niya na may okasyon, nag-attend siya ng recognition event kanina sa RTC-11, kung saan walang tao ang mga rooms nasa recognition lahat, kaya niya ito pinasok, pero biglang bumalik itong biktima at kanyang mga kasamahan kaya siya nahuli,” sulti ni Police Major Ricky Obenza, chief of police sa Tugbok Police Station, sa pakighinabi sa dxAB 1296 Radyo Patrol.
Dihang giaresto na ang suspek, kalit nalang giitsa niini ang kuwarta ngadto sa ilawom sa lingkuranan nga dunay kantidad nga P6,000 nga gituohang gikawat sab sa suspek.
Padayon ang gihimong imbestigasyon sa kapulisan sa Tugbok PNP kung si kinsa pa nga mga trainee ang nawad-an og kuwarta ug mga gamit.
Wala pa mihatag og pamahayag ang suspek.