RIDING-in-tandem ng mamumuno nga mipusil-patay sa niadtong dumadapig sa usa ka kandidato sa dakbayan sa Lapu-Lapu, base sa saysay sa nakasaksi sa hitabo niadtong Abril 27 sa gabii.
Ang Lapu-Lapu City Police Office (LLCPO) nga gipangulohan ni P/Col. Limuel Obon nipahigayon og ocular inspection sa Purok Rambo, Barangay Babag, Lapu-Lapu sa dapit diin gipusil si Cesar Siaton, 59, taga Barangay Pajo.
Nasuta nga way CCTV camera sa area sa dihang ang CCTV camera nga iya sa barangay ang duha na ka semana nga naguba sa dihang naputol ang cable niini human nasangit sa dumptruck.
Tug-an sa saksi (identity gitago) nga atol sa pagpusil diha siya sa iyang tindahan niadtong higayona og nakamatikod sa duha ka lalake nga luwan sa XRM motorcycle nga nagpaingon sa habig sa lungsod sa Cordova.
Mibalik sa agi ang mamumuno sa dihang ilang nalabyan ang biktima nga diha daplin sa dalan mi-abag sa pagpahiluna sa mga sakyanan niadtong motambong sa pulong-pulong nga ipahigayon sa Babag.
Samtang, nagkabayo pa sa motorsiklo ang tawo nga nagtaptap lang og t-shirt ang mipusil sa nagtalikod nga biktima.
Taliwala sa samad nga naangkon ni Siaton nakahigayon pa kini og dagan ug gidali sa pagpasakay sa private vehicle aron nga ihatod sa Lapu-Lapu City Hospital (LLCH).
“Kining atong walk through nakita nato asa ang sakto nga lugar ug challenge namo ang pag-ila (suspek),” dason ni Obon ngadto sa mga tigbalita.
Samtang ang maguwang sa namatay nga si Leopoldo Siaton miingon nga way labot ang politika ang nahitabo sa iyang igsuon kinsa suporter ni mayoralty candidate Junard Chan.
“Ako gyud to siyang gitambagan nga magbantay-bantay gyud ka, kay magkuyog-kuyog ra ba kag politiko,” sumala pa ni Siaton.
Wa say nabantayan ang kabanay nga adunay kiniy gika-away nga posible nanimawos.
Dugang pa ni Obon nga ang nahitabong pagpamusil lakip sa ilang tukion sa ilang Joint Security Coordinating Council meeting karong adlawa, Mayo 2 tali ni election officer Rainer Layson.
Sa sayo pa, ang kampo ni Chan nanawagan sa Comelec Lapu-Lapu ug sa kapulisan nga angayang iisa ang ngadto sa orange level gikan sa yellow category ang status sa dakbayan sa Election Watchlist Areas (EWAS) sa kabalaka sa seguridad sa mga kandidato sa dakbayan.