DUL-AN sa mil kinyentos ka mga magtutudlo sa dakbayan sa Mandaue ang gipaubos sa pagbalik kalabot sa angay ug dili angay buhaton nila nga moserbisyo atol sa adlaw sa piniliay.
Ang maong mga magtutudlo ang gitunga ngadto sa walo ka grupo alang sa katapusan nga ‘briefing on guidelines’ nga gisugdan niadtong Lunes, Abril 29, ug tapuson sa Biyernes, Mayo 3.
Isip holiday kagahaponm Miyerkules, Mayo 1, hinungdan nga nahatagan usab og break ang mga nagdumala sa briefing nga mga kawani sa Comelec.
Usa sa giawhag kanila ang pagsul-ob og puti nga de kwelyo nga shirt atol sa piniliay, kay gihulagway sa kadagkuan (DepEd)sa Departmemt of Education sa Mandaue City division ug sa Comelec nga mao kini neutral nga kolor.
Gibawal usab kanila ang pagsul-ob og tattered jeans ug tsinelas. “This is a refresher for those who have been serving the elections and also orientation for the new members of electoral board on the election guidelines for national and local elections. The what, who, where, how and the relevance of their duties and responsibilities,” gitug-an ni Dr. Ismaelita Desabille, ang focal person sa DepEd Mandaue alang sa umaabot nga piniliay.
Ang maong mga magtutudlo ang gipaubos na usab og pipila ka mga seminar sa niaging bulan pa.
Atol sa briefing ang subli usab nga pag-orient kanila sa paggamit sa voters registration verification machine (VRVM) ug sa sistema niini.
Ang Sugbo ang usa sa pito ka mga probinsya sa tibuok nasud nga gihimo nga pilot area sa paggamit sa VRVM.
Ang dakabyan sa Mandaue ang adunay 244 VRVM alang sa susama nga gidaghanon sa clustered precincts.
Apan bisan pa man anaa ang VRVM, ang Comelec ang niawhag sa mga magtutudlo nga mas maayo gihapon nga unahon sa pagsuta diha sa ilang Election Day Voters List (EDVL) kon registered voter pa ang usa ka botante.
Kay giapsabot ni Jacqueline Reuyan ang assistant election officer sa dakbayan sa Mandaue nga adunay mga ubang botante nga manual nila nga gi-delete diha sa EDVL, tungod sa uban nga bag-o lang nibalhin sa pagkabotante. Sa Mayo 10 himuon unya ang final sealing ug testing sa mga Voters Counting Machine (VCM) diha sa ilang mga clustered precints.
Nag-una nga pahinumdon nila ni Dr.Desabille ug Reuyan sa mga magtutudlo nga moserbisyo ning umaabot nga eleksyon nga paningkamutan nga layo sa sakit, maayo ang panlawas, aron anaa usab sa maayo nga panghuna-huna atol sa pagserbisyo.
Laing hangyo nga tas-an ang ilang pasensya ug pagsabot sa ubang mga botante, kinsa posible aduna gyuy mga kwestyon, ilabi na kabahin sa mga nawala nila nga mga pangalan diha sa present.