NASINATI nga pag-ulan Myerkules sa kaadlawon ug sa buntag, Mayo 1, sa dakbayan sa Mandaue ug pipila ka parte sa siyudad sa Sugbo ug sa ubang bahin sa probinsya, usa lang ka isolated rain shower.
Tungod lang kini sa mas daghan nga dala ng umog (moisture) ang hangin nga silangan o Easterlies ning panahuna.
Si Netherlen Saletrero, ang weather specialist sa PAGASA Mactan, nagkanayon nga posible pa nga makasinati og mga susama nga pag-ulan sa mga mosunod nga adlaw sud ning bulan sa Mayo.
Kay sa naandan, dasosn ni Saletero, sa bulan sa Mayo kasagaran magsugod nga adunay mga thunderstorm nga mamugna, ilabi na nga sa katapusan sa Mayo magsugod ang kausaban gikan sa Easterlies ngadto na sa hangin nga habagat, nga mao kasagaran magdala og ulan.
Apan dili gihapon angay nga magmaya ug angay gihapon nga mag-preserba gihapon og tubig, kat tungod sa presensya sa El Niño phenomenon, maoy hinungdan nga mas mopasulabi gihapon ang kainit sa panahon.
Gilantawan nga below normal gihapon sa gilantawan unta nga 108.8 millimetres nga rainfall measurement alang sa bulan sa Mayo.
Gani sa bulan sa Mayo, gitan-aw sa PAGASA nga dunay usa ngadto sa duha ka tropical cyclone nga mosulod sa nasud.
Gani sa bag-ong projection alang sa El Niño, gilantawan nga posible molanat pa sa bulan sa Hulyo o Agusto ning tuiga.
“Mao ni characteristic sa maynga magsugod na og develop ang mga thunderstorm og rainshowers so all over Cebu, mas daghan gyud nga pag-ulan atong expect for the month of May, however base sa atong forecast nato, gipakita sa atong models dala sa epekto sa El Niño, below normal lang gihapon nga ulan atong gi-expect sa karong buwana,” pagpasabot ni Saletrero sa Superbalita Cebu.
Alang sa bulan sa Abril gipahibalo ni Saletrero nga kulang kita og 41.5 porsyento nga pag-ulan, gikan sa gilantawan unta sulod na sa 30 ka tuig nga 55.6 mm, nitala lang ang buhatan og 23.1 mm.
Samtang niadtong Abril 20 nitala og pinakataas nga temperature sukad Enero ning tuiga, nga niabot sa 34.6 degree Celsius, diin anaa kini heat index nga 43 degree Celsius.
“Naa tay projections nga taas gihapon ang percentage nga mo-last siya (El Niño) until August. Karong May dako sya og tsansa nga mo-prevail gihapon siya for the month of May, pag-abot sa June naa siya around 75 percent chance, to July then August naa gihapon siya 66 percent chance nga mopasalabi siya. But, El Niño doesn’t mean no rain, it is just below normal ang atong gi-expect,” dugang pasabot ni Saletrero sa Superbalita Cebu.