TUNGOD sa programa sa Misamis Oriental Provincial Police Office (Moppo) nga mao ang “Oplan Katok” moabot ngadto sa 156 ka mga loose firearms ang nasakmit sa kapulisan dinhi sa probinsya sa Misamis Oriental.
Si Police Colonel Rolando Destura, Moppo director, nipasabot nga ang "Oplan Katok” mao ang pagpanuktok sa kabalayan aron sa paghangyo nga i-surrender nila ang ilang nagkadaiyang kalibre sa armas nga dili lisensiyado o ba kaha expired na ang lisensiya niini.
Mikabat sa 156 ka loose firearms ang nasakmit sa kapulisan gikan sa 23 ka lungsod sa lalawigan. Kini sugod lamang Enero hangtud Abril 2019 nga operasyon.
Adunay kinatibuk-ang 2,000 sab sa ihap sa armas nga gitago karon sa buhatan sa Police Regional Office (PRO)-Northern Mindanao.
Nag-una sa labing daghang ihap sa nasakmit nga dili lisensiyadong armas ang dakbayan sa El Salvador (33); ikaduha ang lungsod sa Jasaan (24); ug lungsod sa Initao (16) nga anaa sa ikatulo nga pwesto.
Gireport kini ni Destura atol sa pagpaabot niini sa accomplishment report.
Sa iyang bahin ni Misamis Oriental Governor Bambi Emano gipaabot niini iyang pagdayeg sa kapulisan tungod kay daw kon dili kini mabawi sa kapulisan.
Ning nagsing-abot ang piliay basin unya gamiton sa pagpanghulga sa mga botante lakip na sa nagkadaiyang krimen.
Gidayeg niini ang pamunoan ni Destura tungod kay nagpabilin nga luwas sa kriminalidad ang probinsya.