Moreno suportado ni Borres

BUOT ihatag sa usa ka kandidato ang iyang boto ngadto sa iyang kaatbang karong umaabot nga eleksyon sa Mayo 13, 2019.

Si Felix Borres, magpapili pagka mayor sa Siyudad sa Cagayan de Oro ug independente nihayag sa iyang boto ngadto kang Mayor Oscar Moreno.

Kini atol sa gipahigayon nga candidates forum niadtong Abril 30 sa Little Theater sa Xavier University ning siyudad nga gitambongan sa upat ka mga kandidato pagkamayor nga naglakip nila Jose Gabriel "Pompee" La Viña ug Benjamin Contreras.

Atol sa ulahing forum sa mayor ug pagka bise mayor gitanyag ni Borres ang suporta ngadto kay Moreno kun ugaling dili man kini iboto.

"Kun di mo mobotar nako Borres for mayor ihatag ko nalang kay Oscar Moreno, ing ana man akong lihok kundili suportahan nalang nato aron ma improve pa ang Cagayan,” matud ni Borres.

Samtang mapasalamaton usab si Moreno sa gipadayag ni Borres ug gani niingon pa nga manghinaot nga masunod na sila si Contreras ug La Viña.

"Salamat. I hope sila Pompee and Ben will follow soon,” matud ni Moreno.

Kahinumdoman nga atol sa maong forum dunay gamay nga pagkainitay diha sa debate tali ni Moreno ug ni La Viña gumikan kay ginahisgotan ni La Viña ang kaso ni Moreno apan gipahiyoman lamang kini ni Moreno.

"When you're talking about corruption ang atong mayor wala tubaga gikataw-an lang nila ang concern sa mga tao,” matud ni La Viña.

Nibutyag usab si Moreno nga gipatas-an pa ang pasensiya ug nagtutok na lamang ngadto sa iyang programa.

“It was an act of desperate but looking on the bright side gi-test gyud akong patience and humility, well there were many out of line moves but we just have to focus on the need to convey to the people our plans to the city,” matud usab ni Moreno.

Samtang dako ang pasalamat sa Lihuk Movement sa malampusong candidates forum.

Malipayon usab ang tinugyanan sa Commission on Elections lakip na sa National Citizens' Movement for Free Elections (NAMFREL) tungod kay alang kanila malampuson ang maong kalihukan diin nakapadayag ang mga kandidato sa ilang mga panghunahuna, programa ug plataporma.

“Para sa ako successful kaayo to nga forum despite nga wala ang vice mayor, nakapahungaw gyud sila sa ilang gibati ug plataporma ug unsa pa ang ilang gusto mahitabo sa mga kandidato dugang pag-ila,” matud ni abogado Ramil Acol sa Comelec.

Gidugang usab ni Nestor Banuag, lead convenor sa Lihuk Movement ug NAMFREL provincial coordinator, nga malampuson ang kinatibuk-an nga kalihukan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph