ANG bana ni Rosario nga si Lito nadakpan sa mga pulis human ang naulahi milunsad og kampanya batok sa ginadiling drugas. Usa si Lito nga gipahimangnoan sa kapulisan sa ilang lungsod nga pahunungon sa pagbaligya og ginadiling drugas, apan wala siya mopatuo.
“Gitabangan ka nga mohunong na pabaligya og shabu. Gahi man kag ulo!” sudya ni Rosario nga naghilak samtang miduaw sa iyang bana sa bilanggoan.
“Wala koy laing panginabuhian.” rason ni Lito nga nagmahay sa iyang gibuhat.
“Nagsabak ko! Kaluoy sa umaabot natong anak. Magtubo nga walay amahan!” ni Rosario.
Tungod kay dili mapiyansahan ang kaso ni Lito, nabilanggo siya sa CPDRC. Unya gibalhin siya sa Iwahig Penal Colony sa Palawan kay napuno na ang bilanggoan sa CPDRC sa daghang piniriso.
Nanglabay ang mga bulan.
“Lalake imong anak,” matod sa mananabang nga miatiman kang Rosario.
“Salamat sa imong pagtabang!’ ni Rosario nga nalipay samtang nagsud-ong sa iyang anak. Rosalito ang iyang gingalan niya sa iyang anak isip handumanan sa ilang gugma sa iyang bana.
Tungod kay tua man sa bilanggoan ang iyang bana nag-inusara si Rosario nga nag-atiman ug pagpadako sa iyang anak. Midawat siya bisan unsang klase sa trabaho aron adunay kapanginabuhian. Paglabay sa hataas nga panahon naputol ang ilang komunikasyon ni Lito.
Tungod kay batan-on pa adunay mga lalake nga nakagusto kang Rosario. Usa niini si Bobby nga kauban niya sa tindahan nga iyang gitrabahoan.
“Rose, mamords ka man gihapon,” ni Bobby nga mipasumbingay kang Rose.
“Pag-syur diha,” ni Rosario nga nakagusto sab sa hilom sa ulitawo. Panahon sa kagabhion moduaw si Bobby sa payag nga gipuy-an ni Rosario. Kanunay sila mag-estorya kabahin sa ilang plano sa kinabuhi. Wala madugay nagkasinabot da ang ilang mga kasingkasing. Aron makahigayon si Bobby iyang hatagan og kuwarta para internet si Rosalito.
“Nagsabak ko!” tug-an ni Rosario kang Bobby usa ka higayon nga nahiduaw ang ulitawo.
“Okey lang. Andam ko manubag. Swerte hinuon kay mahimo na kong tatay!” ni Bobby nga nalipay sa iyang nasayran.
Nanganak si Rosario. Lalake gihapon ang iyang anak. Sa laing bahin si Rosalito na-adik sa internet kay napasagdan ni Rosario tungod sa relasyon nilang Bobby ug sa kadaghan niya nga giatiman.
Usa ka higayon gipatawag si Rosario sa ilang Barangay Kapitan kay si Rosalito naapil sa mga batan-on nga nangawat og manok. Gitambagan siya sa Kapitan nga atimanon niya ang iyang anak kay kanunay sab kini dili moeskuyla panahon sa ting-klase.Wala magdugay miundang pag-eskuyla si Rosalito. Bisan unsaon pagtambag ni Rosario ang iyang anak, dili kini maminaw kaniya.
Dali rang nanglabay ang mga adlaw, semana ug mga bulan. Karon ulitawo na si Rosalito. Kanunay siya uban sa iyang barkada nga mga adik sa ginadiling drugas. Gipasagdan na lang siya sa iyang inahan kay dili man gyud siya mopatuo sa iyang inahan. Usa ka higayon samtang migamit og shabu si Rosalito kauban sa iyang mga barkada nadakpan sila sa mga pulis.
Nabilanggo si Rosalito ug giduaw siya ni Rosario aron piyansahan.
“Ma, naadik ko kay gipasagdan man ko nimo. Wa kay pagmahal nako! Buhi pa gani si Papa imo nang giilisan!” sudya ni Rosalito.
“Anak, biktima sab ko sa kapalaran. Sa panahon nga nabilanggo imong amahan si Bobby ang mitabang kanato aron makalingkawas sa kalisdanan,” pasabot ni Rosario.
Human makapiyansa misakay sila og taksi. Samtang nagdagan ang taksi kalit milanog ang usa ka masipang buto. Gipusil si Rosalito sa wa-mailhing mamumuno nga nagsakay og motorsiklo. Naigo si Rosalito sa ulo. Gigakos siya ni Rosario. Ang taksi dali nga mihatod kanila sa ospital, apan gi-deklarar sa doktor nga ‘dead-on-arrival’ si Rosalito.
“ANAK, pasayloa ko!” tuaw ni Rosario samtang nagbutang og bulak sa nitso ni Rosalito. Nagmahay siya sa iyang nabuhat nga wala makatagad pag-ayo sa iyang anak. Apan ulahi na ang tanan. Ulahi na ang iyang kahiamgo nga napasagdan gayud niya si Rosalito. (KATAPUSAN)