DEAR Noy Kulas,
Just call me Mr. Confused. Kining akong problema dako kaayo kay nagpalabi sa gibati. Lami na kaayo ipakamatay kay di lalim. Naa koy tulo ka mga uyab. Wa sila mag-ilhanay kay ang usa akong schoolmate while ang duha sa laing schools. Aron di ko masakpan, ako ni silang I-schedule og dates pero kanang tago-tago nga style.
Hangtod nakuha nako ang ilang pagkababaye. Dungandungan kay nadala nako sa estorya. Actually, uyab ni nako sila mga one year na kapin so, kompyansa ra kaayo sila nako nga sila ra but wa sila kahibawo nga tulo sila. Mao na nga wa na ko maglisod sa pagkuha nila.
Mao ni ang akong problema karon. Two months nang buntis ang tulo. Ako na ning na confirm sa kanang kit sa pregnancy test. Naglibog ko unsay akong buhaton kay nagtuo ra ba akong parents nga wa koy uyab kay okay kaayo ang akong grades. Gusto na sila nga moatubang ko sa ilang parents pero tulo ni sila ka buok. Unsa kahay akong buhaton? Di kaha ko patyon og kulata sa akong papa?
MR. CONFUSED
Mr. Confused,
Akong gi-assume nga teenager ka pa kay estudyante ka sa college. Busa dako gyud nang problema kay imo na silang mga responsibilida. Lisod man gani ang usa lang, unsa na kaha nang tulo.
Wa kay laing mabuhat niana kon di ang pag-atubang sa imong mga responsibilidad kanila. Ikaw man ang amahan, imong barugan, apan pahibaw-on mo ang imong mga ginikanan sa nahitabo. Atubanga ang unsa may ilang reaksyon sa imong nahimong sayop. Ayaw dagani ang imong responsibilidad kay imo man nang tinuyoan. Way disgrasya sa pagmabdos, gawas lang kon imong gi-rape nang mga bayhana.
Dawata ang consequences ug atubanga. Way problema nga di molabay. Ang tanan molabay lang. Sama ea na sa unos nga kusog sa pag-abot, apan mohunong o molurang ra. Natural nga ngil-ad na sa pagsugod, apan moarang-arang hangtod nga molabay ra ang tanan. Usahay ba, nagkinahanglan kita og leksyon sa kinabuhi aron makamatngon kita sa mamahimong linugdangan niini. Sagad, diha kita usab makakuhag kusog aron pagbarog gikan sa mga hagit.
Timan-i, way problema nga di nato makaya. Kon di ka pa mahimong makasuporta karon, humana ang imong pagtungha aron pagkahuman nimo, duna ka nay hinagiban nga magamit alang sa pagpangitag kapanginabuhian nga ikasuporta nimo sa imong tulo ka mga anak.
NOY KULAS