MOABOT sa 700 ka mamugsayay gikan sa nagkalainlaing suok sa nasod ang magkombati sa 2019 Cebu City Dragonboat Regatta nga gikatakda karong Mayo 4-5 sa Bayfront Il Corso Mall, South Road Properties sa dakbayan sa Sugbo.
Ang mamugsayay gibahin sa nagkalainlaing teams nga naglakip sa Bugsay Marajao, Bagsik Dragon Boat Team, Braveheart Dragonboat Team, Father Saturnino Urios DB Team, CDO PWD, Yellowfins, Umagu, Black Manta Warriors, Bohol Paddlers Association Inc., Chasin Dragons-JP Morgan ug One Piece Dragon Sangres.
Naa sab sa listahan ang Bugsay San Carlos, SJ Banati, Dauis, Kujaw Tiger Dragons, Army Dragons of Manila, Naga Bugsay, Shangrila Mac Dragons, Triton, Poseidon, Cebu Fireblades ug Mizuchi DBT Racing Team.
Ang partisipanteng teams nagagikan sa Tacloban, Cebu City, Lapu-Lapu City, Cagayan de Oro City, Surigao City, Manila, Butuan, Dumaguete City, Bohol, Surigao City, Surigao del Sur ug Negros Occidental.
Ang mga kategoriya nga kombatihan mao ang 200-meter premier open small boat, premier mixed small boat, premier women small boat, inter-city paradragon championship small boat, youth mixed small boat, youth open small boat, ug youth women small boat.
Ang kampion sa premier open small boat, premier women, premier mixed makadawat og P20,000 nga ganti matag usa, ang second placers adunay P15,000 samtang P10,000 sa 3rd placers.
Nagpasiugda sa lumba mao ang Philippine Accessible Disability Services Inc. (Pads) ug gisuportahan kini sa Cebu City Government. (RSC, ESL)