LIBUAN ka mga batan-on ang nagpahigayon og clean-up drive atol sa Labor Day Miyerkules sa buntag, May 1, diha duol sa Equiparco sa coastal road sa may Barangay Gusa, Siyudad sa Cagayan de Oro.
Anaa sa 1,300 ka mga batan-on sa youth sector gikan sa 50 ka mga barangay ug kasagaran sa distrito dos ning siyudad.
Sa pakighinabi sa SunStar Superbalita kang Kagawad John Michael Seno, Sangguniang Kabataan Federation president, nga tumong niini nga mamahimong limpyo ang siyudad ug mismo ang sektor sa kabatan-onan ang nagpaluyo niini.
“Ang kahinlo sa paligid dili lang kay obligado sa mga opisyales kundili mismo ang kabatan-onan na ang nagpaluyo niini nga kalihokan,” matud ni Seno.
Gidugang pa niini nga kining mga kabatan-onan ilabi na youth volunteers dugay na kining gimugna aron nga makatabang sa kinaiyahan, sa siyudad ug sa uban pa pinaagi sa paglambigit sa mga kalihukan nga alang sa kaayohan sa tanan ug nagpasalamat sa katawhan nga nisuporta sa mga kabatan-onan ilabi na sa lokal nga kagamhanan sa siyudad.
Samtang nagpasalamat usab si Association of Barangay Councis (ABC) president Yan Lam "Alam" Lim nga usa sa mga nisuporta sa programa ngadto sa kabatan-onan nga gihatagan og pagtagad ang kinaiyahan.
“Dako akong pasalamat kanila nga nag volunteer sila og clean-up drive ug dako akong pasalamat nga dako ilang pagtoo kanako kung mahimo ta og kongreso ato gyud na unahon kay mao gyud na ang giingon ni Presidente nga unahon gyud nato,” matud ni Lim.
Nasayran nga gisuportahan sa kabatan-onan ilabi na sa united youth sector si Lim kauban ang kaalyado niini pinaagi sa usa ka manifesto.
Ang tema sa maong kalihukan mao nga "Kabatan-onan, Kauban sa Kinaiyahan.”