HUMAN niulbo ang reklamo sa Metro Cebu Taxi Operators dinhi sa Sugbo pinaagi sa liderato ni Richard Cabucos sa daghang anomaliya sa Land Transportation Franchising and Regulatory Board (LTFRB) Region 7 ni Director Romulo Bernardez giduyogan usab kini pag-apil sa pagreklamo sa mga bus operators.

Si Cebu City Mayor Tomas Osmeña naagni na sa pag-apil ning maong problema og nipasalig nga dili lamang niya itunol kang Pres. Gloria Macapagal Arroyo ang suwat reklamo sa mga taxi operators ug mga drayber dinhi sa Sugbo, kon dili iya gyud nga pangayuon sa pangulo nga tangtangon na si Bernardez sa iyang gilingkurang katungdanan kay gikinahanglang maundang na kining matanga sa mga tinunto sa atong pangobyerno.

For updates from around the country, follow Sun.Star on Twitter

Sa iyang bahin si Director Bernardez sa dihang atong nahinabi sa Tulumanong Alagad sa DYRF Radyo Fuerza, 1215 Khz AM nipadayag nga iyang gihangop kining maong pagpahaba ni Mayor Osmeña ngadto sa presidente kay maoy iyang gusto ang pagpatawag kaniya ug ang paghatag kaniya’g kahigayunan pagtubag ug pagdepensa sa iyang kaugalingon.

Taliwala ning maong pagbinatuay sa mga pasangil ug alegasyon ug pagpanglimpyo sa kaugalingon, nigawas ang bag-ong memorandum circular no. 2010-009 gikan sa uluhang buhatan sa LTFRB National Office pinirmahan ni Chairman Alberto Suansing nga nagsuspenso sa implementasyon sa MC-2009-35 nga una ng naghatag og aplikasyon ug appropriation sa mga abandoned ug expired Certificates of Public Convenience sa tanang Regional Offices.

Tungod niini, nasayang ang pagpahimulos sa mga nakabayad nga mga operators sa mga abandunado na kunong mga prankisa ug ihapak na lang, matod pa, sa laing mga balayranan ang maong nahimo ng payments diha sa LTFRB Regional Office. Apan nganong ibalhin man sa laing katuyuan nga specific man unta ang hinungdan sa mao nilang pagbayad sa gobyerno? Tilimad-on ba kini sa buhat nga nahimo ng naandan ning maong buhatan? O matawag nga mirisi usab sa mga oportunistang mga operators nga nasugamak sa ila mismong pagpahimulos?

KRISIS SA PAMARKO

Di lamang ang mga sakyanang pampubliko nga naa sa kayutaan ang nasugamak og dakong problema. Hasta ang shipping industry nga kasagarang mga operators dia nagbase sa Sugbo ang nialma na usab sa gipagawas nga mga polisiya sa naglingkod nga Marina Director Maria Elena Bautista.

Sa gihatag nga palusot nga igo lamang siyang nagpatuman sa lagda sa standardization sa marine transportation, nimando si Bautista sa pagpatuman sa mga bag-ong requirement sama sa kagamitan sa barko, insurance og uban pa nga pwerteng mahala kay pulos man nakabase ang mga suppliers sa gawas sa nasud mo nga dollar rate usab ang presyo nga angay pagabayran.

Nga kon kini ipasa ngadto sa mga sumasakay, mahimong malumos ang yanong Pinoy sa pag-usbaw unya sa pletihan. Maayo lagi og tinud-anay gyud kining gihimo sa ngalan sa maritime safety apan naa nas pahak ang di malilong nga kagaw sa S.O.P.