DAGHANG ginikanan ang nagbagulbol sa bag-o nga patakaran sa mga eskuwelahan kay usa sa mga requirements alang sa enrollment sa mga bata ang Certificate of Live Birth apan gidumilian pagdawat sa mga magtutudlo ang mga gi-issue ubos sa buhatan sa National Statistics Office (NSO) kay bag-o na kuno ang pangalan sa maong buhatan.
Ang kanhi NSO gihimo na karon nga Philippine Statistics Authority (PSA) apan ang serbisyo nga ilang buluhaton mao gihapon ang mga ginatrabaho sa kanhi NSO.
Ang mga kawani o mga trabahante mao ra gihapon kaniadto, nan, unsa may kalahian sa Certificate of Live Birth kaniadto ug sa karon nga pangalan ra man sa buhatan ang giusab?
Masabot ba nga kon ugaling ilisdan na sab sunod bulan ang pangalan sa buhatan mokuha na sab og lahi nga certificate ang mga ginikanan kay bag-o na ang pangalan sa buhatan?
Dili baya libre ang maong dokumento kon mokuha ka. Sala ba sa mga ginikanan nga giilisan ang pangalan sa buhatan nga lisud-lisuron man sila aron mapaeskuwela ang ilang mga anak? Wala may mausab sa mga detalye sa rekord sa bata kay ang tanan nga impormasyon mao ra gihapon.
Unsa kahay tumong nganong ing-ani man ang instruksiyon sa mga magtutudlo?
Aron ba makakuwarta ang gobyerno? Di ba kaha buot-buot ra mo.
Ato ning masayran puhon gikan sa inyong labaw, mga sir ug ma’am.
Sa laing bahin, atong ginalantaw nga mahimong halandumon ug dili makalimtan sa mga atleta, coaches ug mga opisyal nga gibanabana nga mokabat sa 18,000 ang ilang pagtambong sa Palarong Pambansa nga gi-host sa dakbayan sa Davao nga gibuksan niadtong Dominggo sa hapon didto sa Univerity of the Philippines Mindanao Sports Complex sa Mintal.
Giaporan ang matag delegado og bag nga gisudlan og daghang mga giveaways sa mga kompaniya nga misuporta sa maong katikaran.
Nakaingon ko nga usa kini ka halandumon sa kinabuhi sa mga delegado kay mora’g unang higayon kini nga nahitabo sa kasaysayan sa Palarong Pambansa gikan sa kagamhanan sa dakbayan sa Davao.