PUNTING sa Department of Labor and Employment (Dole) nga himuon nga regular ang sobra 9,000 nga mga contractual employees sa Soccsksargen karong tuiga.
Matud ni Dole-Soccsksargen director Sisinio Cano nga nagpadayon ang ilang inspeksiyon sa mga kompaniya sa rehiyon.
Tumong niini aron masayran kung misunod ba sila sa Executive Order nga tapuson na ang contractualization.
Sa pinaka-ulahing talaan sa Dole-Soccsksargen, sobra 1,400 nga mga contractual employee ang na-regular na sugod Enero hangtud Abril karong tuiga.
Kini mas ubos kung ikumpara sa sobra 9,000 nga contractual employee nga nahimong regular niadtong 2018.
Nagbahad ang Dole-Soccsksargen nga silotan ang mga kompaniya nga wala misunod sa tamang suwelduhan sa ilang mga trabahante.
Gibutyag ni Cano ang maong katikaran atol sa selebrasyon sa Labor Day, kagahapon, Mayo 1.
Samtang nagpasalamat ang mga molupyo sa rehiyon nga nakakita og trabaho atol sa Job and Business Fair sa Dole. (Edgar E. Fuerzas)