KIDAPAWAN CITY -- Walay umento sa suweldo sa mga mamumuo sa Soccsksargen dungan Labor Day, Mayo 1.
Sumala kang Regional Tripartite Wages and Productivity Board (RTWPB)- Soccsksargen director Jessie Dela Cruz nga gihulat pa nila ang resulta sa poverty threshold survey sa Philippine Statistic Authority (PSA).
Ang poverty threshold survey sa PSA maoy sumbanan sa RTWPB-Soccsksargen kung kinahanglan ba nga tas-an ang suholan sa mga empleyado sa pribado nga kompaniya.
Dugang ni Dela Cruz nga nagpadayon karon ang ilang pagsusi kabahin sa socio-economic indicators.
Walay nadawat ang RTWPB-Soccsksargen nga petition for wage increase gikan sa grupo sa mga mamumuo sa rehiyon.
Karong Mayo 11 mag-usa na ka tuig ang Wage Order #20 nga nagtakda sa P311 nga suholan matag adlaw sa mga mamumuo sa non-agriculture sector ug P290 sab sa agricultural, retail and services sector sa rehiyon.
Gikompirma sab ni Dela Cruz nga dunay mga kompaniya sa rehiyon nga wala misunod sa RTWPB sa pagtaas sa suweldo sa mga mamumuo ug posibleng mag-atubang og tukmang kaso. (Edgar E. Fuerzas)