PAGKADALI ra gyud modagan sa panahon. Ang nahitabong makasaysayanong Edsa People Power 1 revolution nga maoy nakapalagpot sa diktador nga si Pres. Ferdinand Marcos, daw kagahapon lamang nahitabo. Apan 24 ka tuig naman diay kini nahitabo ug sumad karong adlawa. Nilanat og tulo ka adlaw ang maong labing unang People Power usa napalayas gikan sa Malakanyang ang banay’ng Marcos.
Nigamit ako sa pulong nga ‘labing una’ gumikan kay aduna may laing People Power nga nahitabo niadtong 2001 sa dihang gipalagpot usab si kanhi Presidente Joseph Estrada, kinsa karon magpapili pag-usab sa susamang posisyon aron ipadayon kuno ang iyang wala matiwas nga mga programa. Ayaw na lang ta Erap, wala na magkinahanglan kanimo ang katawhan. Kon sa umaabot nga mga adlaw, duna pay laing Presidente sa nasud nga palagputon, aw, naa na pod unyay Edsa 3. Diha na bitaw unta to panahon ni Pres. Gloria Macapagal Arroyo pero wala lang mosaler.
KAUSABAN
Human mapalagpot si Marcos, nakabaton na ug kausaban ang nasud labi pa kon maghisgot kita og demokrasya. Naghanggab na sa hangin sa demokrasya ang katawhan kay dili na diktador ang nagdumala sa renda sa pangagamhanan. Tinuod. Kay sa panahon ni Marcos, mangitngit ug dulom ang dagan sa demokrasya. Pero mao lagi pod na, sobrang demokrasya morag mahulog na usab nga walay ngipon ang atong gobiyerno.
Apan gawas sa demokrasya, unsa man ang mga kausaban nga atong natagamtaman human sa makasaysayanong Edsa 1? Para nako morag wala na. Nagpabilin nga bulok ang pulitikanhiong sistema sa atong nasud. Ang mga nisunod ni Marcos mao ra gihapon ang gihimo. Naghitak gihapon ang kurapsiyon ug pang-abuso sa tawhanong katungod. Nagpabilin lang gihapon ang problema sa kawad-on og mas midaghan pa man gani ang nag-ilaid sa tumang kalisod. Sobra gihapon ang pamulitika ug ang mga pulitiko walay gilangtaw kon dili ang ila lamang nga interes. Walay kaayuhan nga nakab-ot ug wala kita mo-asenso.
MOPILI UG TARUNG
Walay na-ani ang Edsa 1. Daghan man gani ang mo-ingon nga maayo pa sa panahong Marcos kay disiplinado ang tanan. Pero mao lagi nagpuyo pod ta sa kalisang.
Karon eleksiyon gikinahanglan siguro nga mopili kita og tarung nga presidente nga modumala sa atong nasud sa mosunod nga unom ka tuig. Dili na kita magpadala nianang kuwarta ug pasalig sa mga pulitiko. Pero ang pangutana og aduna ba unyay tarung nianang mga gustong magpapili ug ila ba kaha usab nga tumanon ang ilang mga gipangsaad.
(bgnalzaro@gmanetwork.com)