WALAY kaayohan nga nahatag si Pangulong Rodrigo Duterte ngadto sa mga mamumuo gikan sa paglingkod niini hangtud ning kasamtangan.
Kini ang gibutyag ni Carlo Olalo, ang secretary general sa Kilusang Mayo Uno, atol sa ilang gihimo nga lihok-protesta Miyerkules, Mayo 1, sa Freedom Park, Roxas Avenue, Davao City atol sa ika-133 nga Labor Day.
Sumala ni Olalo nga ang Executive Order # 51 nga gilagdaan suma pa ni Duterte nagtumong alang sa pagpa-undang sa kontraktuwalisasyon ang wala kuno gihapoy epekto ngadto sa mga mamumuo.
Niining kasamtangan, padayon nilang ginaduso ang P700 nga minimum wage increase alang sa mga mamumuo sa tibook nasud nga dapat kuno ihatag sa gobyerno.
Ila usab gikondena ang ginahimo kuno nga red tagging sa gobyerno ngadto sa mga grupo sa militante, nga matud pa nila usa sa ilang ginabatikos og maayo.
Magpadayon kuno sila sa pagsinggit alang sa katungod sa mga mamumuo ug gusto nila nga unta tagdon ni Presidente Duterte ang ilang mga mulo. (Richy F. Nalagon)