NAG-ABOT ug nagdungan og pa-blotter sa Sta. Ana Police Station ang magsilingan nga sila Marissa (bansagon gitago) ug si Shaine (nagpatago sab sa apelyedo) human sila nagbugno gumikan sa hayhayan Miyerkules sa buntag, Mayo 1, sa Barangay Centro Agdao, Agdao District, Davao City.
Sumala ni Marissa nga sayo sa buntag Miyerkules, sayo siya nga nanglaba aron makapahulay og sayo kay holiday, ug sa dihang nanghayhay na kini sa iyang mga linabhan, kalit lamang sab miabot kining si Shaine kinsa nagdala sa iyang linabhan nga habol og kalit nga gisapaw sa hinayhay nga sanina ni Marissa.
Gumikan sa hitabo, naglalis ang duha, hangtud sa ilang paghagitay nga magsinumbagay ug magdumog sila.
Sa kainit sa ulo, miadto si Marissa ngadto sa panimalay ni Shaine ug nahitabo ang sinumbagay ug panagbugno.
Sumala ni Marissa nga iya lang gitubag ang hagit ni Shaine nga magsumbagay ug magdumog sila, gani nahuboan pa kining si Marissa atol sa ilang panagbugno gumikan nagisi ang iyang sanina.
Apan ang gireklamo ni Marissa mao ang alegasyong pagdunggab kaniya, diin maayo na lamang kay wala suma pa siya masamad.
Sa bahin ni Shaine nga dili siya ang nag-una og hagit diin iya lamang gidepensahan iyang kaugalingon human suma pa misulong si Marissa.
Nasayran nga walay nanag-iya sa maong hayhayan diin si bisan kinsa nalang ang mogamit niini.
Ang duha gitambagan sa kapulisan nga human sa ilang pagpa-blotter, mag-abot sila sa barangay aron didto sila husayon.