MOKABAT sa 16 ka dugang mga bloke sa cocaine nga dunay kinatibuk-ang timbang nga labing minos 20 ka kilo ang nakaplagan sa kabaybayunan sa lungsod sa Lingig, Surigao del Sur.
Ang 16 ka mga bloke, nga gibana-banang mobalor og P100,000 million gitugyan ngadto sa Lingig Municipal Police sa mananagat nga si Jolan Basarde Pucot, 25.
Usa ka taho gikan sa Lingig Police niingon nga si Pucot nakapag sa 16 ka bloke sa gituohang cocaine dihang siya nanagat sa kadagatan sa Barangay Handamayan niadtong Martes sa gabii, Abril 30.
Ang taho nagkanayon nga si Pucot dali nga nitugyn sa kontrabando ngadto sa police station.
Ang mao nga mga butang itugyan ngadto sa Philippine National Police (PNP) Crime Laboratory. Sukad niadtong Pebrero 10,ang kapulisan nakakuha na og 100 kapin ka kilo sa cocaine sa kadagatan.
Mga bloke sa cocaine nakaplagan nga naglutawlutaw sa kadagatan sa Aurora, Quezon, Camarines Norte, ug Camarines Sur sa Luzon, ngadto sa Dinagat group of islands sa Caraga region, Davao Oriental, Surigao Del Norte, ug Surigao Del Sur sa Mindanao. (SunStar Philippines)